ریونت ریڈی کا بڑا اعلان 100 اسٹارٹ اپس کو 2034 تک یونی کارن بنانے کا ہدف

وزیراعلیٰ ریونت ریڈی نے کہا ہے کہ حیدرآباد کے اسٹارٹ اپس کو ملک کی ترقی میں کلیدی کردار ادا کرنا ہوگا۔ انہوں نے اسٹارٹ اپ بانیوں سے اپیل کی کہ وہ حکومت کے 1000 کروڑ روپے کے اسٹارٹ اپ فنڈ کا بھرپور فائدہ اٹھائیں۔ ان کا کہنا تھا کہ حیدرآباد کے کم از کم 100 اسٹارٹ اپس کو 2034 تک یونی کارن بننا چاہیے، جن میں 10 کو سپر یونی کارن کی سطح تک پہنچنا ہوگا۔

وزیراعلیٰ نے ٹی ہب میں نئے گوگل فار اسٹارٹ اپس ہب کے آغاز کے موقع پر خطاب کرتے ہوئے کہا کہ ریاست کا مقصد یہ ہے کہ حیدرآباد نہ صرف اسٹارٹ اپس کا مرکز بنے بلکہ یونی کارن دارالحکومت بھی کہلائے۔ انہوں نے کہا کہ حکومت اور گوگل مل کر ریاست میں مضبوط اسٹارٹ اپ ماحول تیار کر رہے ہیں۔

ریونت ریڈی نے بتایا کہ گوگل ہب کے ذریعے منتخب اسٹارٹ اپس کو سال بھر مفت ورک اسپیس، رہنمائی اور مختلف سرمایہ کاروں تک رسائی فراہم کی جائے گی۔ انہوں نے کہا کہ مقابلہ صرف خیال سے نہیں جیتا جاتا بلکہ محنت، ٹیم ورک اور مضبوط منصوبہ بندی ضروری ہے۔

اپنے خطاب میں وزیراعلیٰ نے مثال دیتے ہوئے کہا کہ 1998 میں ایک چھوٹے سے گیراج میں شروع ہونے والا ادارہ آج دنیا کی سب سے بڑی کمپنیوں میں سے ایک ہے۔ اسی طرح حیدرآباد کے اسٹارٹ اپس بھی آنے والے برسوں میں اربوں روپے مالیت کی کمپنیوں میں تبدیل ہوسکتے ہیں۔

انہوں نے مزید کہا کہ ریاست کا ہدف ہے کہ 2034 تک معیشت کو 1 کھرب ڈالر اور 2047 تک 3 کھرب ڈالر تک لے جایا جائے۔ انہوں نے اسٹارٹ اپس سے اپیل کی کہ وہ ابھرنے والے مواقع سے فائدہ اٹھائیں اور مستقبل کی ترقی میں اپنا کردار ادا کریں۔