پونے میں خوفناک حادثہ، 8 افراد ہلاک، 20 سے زائد زخمی
پونے-بینگلورو ہائی وے پر ناوالے برج کے قریب جمعرات کو پیش آنے والے ایک خوفناک حادثے میں آٹھ افراد ہلاک اور بیس سے زائد زخمی ہوگئے۔ یہ حادثہ اس وقت پیش آیا جب دو کنٹینر ٹرکوں میں ٹکر کے بعد زبردست آگ بھڑک اٹھی، جس میں ایک کار بھی پھنس گئی۔
پولیس کے مطابق ایک کنٹینر ٹرک کے بریک فیل ہونے سے وہ تیز رفتار میں کئی گاڑیوں سے ٹکرا گیا، جس کے نتیجے میں زنجیری تصادم ہوا۔ آگ لگنے سے موقع پر بھگدڑ مچ گئی۔
ریسکیو ٹیمیں اور فائر بریگیڈ فوری طور پر موقع پر پہنچ گئیں اور کئی گھنٹوں کی جدوجہد کے بعد آگ پر قابو پایا گیا۔ زخمیوں کو قریبی اسپتالوں میں منتقل کیا گیا ہے، جن میں سے کئی کی حالت تشویشناک بتائی جا رہی ہے۔
پولیس افسر کے مطابق، ابتدائی رپورٹ سے ظاہر ہوتا ہے کہ حادثہ تیز رفتاری اور مشینی خرابی کے باعث پیش آیا۔ ایک ٹرک کے بریک فیل ہونے کے بعد اس نے سات سے آٹھ گاڑیوں کو ٹکر ماری، جس سے دونوں ٹرکوں اور ایک کار میں آگ لگ گئی۔
این سی پی-ایس پی رکن پارلیمنٹ سپریا سولے نے حادثے پر گہرے دکھ کا اظہار کرتے ہوئے کہا کہ یہ واقعہ انتہائی افسوسناک ہے۔ انہوں نے جاں بحق افراد کے اہلِ خانہ سے تعزیت اور زخمیوں کی جلد صحتیابی کی دعا کی۔
