امریکہ نے بھارت کو "انتہائی اہم” قرار دیا، جے شنکر اور مارکو روبیو کی ملاقات میں تجارت
نیویارک: اقوام متحدہ کی جنرل اسمبلی کے اجلاس کے موقع پر بھارت کے وزیر خارجہ ایس جے شنکر اور امریکی وزیر خارجہ مارکو روبیو کے درمیان اہم ملاقات ہوئی۔ اس ملاقات میں دونوں ممالک کے درمیان تعلقات کو مزید مضبوط بنانے پر زور دیا گیا۔
امریکی محکمہ خارجہ نے اپنے بیان میں بھارت کو "انتہائی اہم ملک” قرار دیتے ہوئے کہا کہ امریکہ، بھارت کے ساتھ تجارت، توانائی، دفاع، دواؤں اور اہم معدنیات سمیت کئی شعبوں میں شراکت داری کو مزید بڑھانا چاہتا ہے۔
ملاقات میں دونوں رہنماؤں نے اس بات پر اتفاق کیا کہ امریکہ اور بھارت مل کر آزاد اور کھلے انڈو پیسفک خطے کے فروغ کے لئے کام کریں گے، جس میں کواڈ اتحاد کے ذریعے تعاون بھی شامل ہے۔
جے شنکر نے کہا کہ بات چیت میں کئی اہم دو طرفہ اور عالمی مسائل پر گفتگو ہوئی اور مستقبل میں مسلسل رابطے پر اتفاق کیا گیا۔ دونوں رہنماؤں نے اس بات پر زور دیا کہ تعلقات کو آگے بڑھانے کے لئے مشترکہ کاوشیں ضروری ہیں۔
