اداکار ستیش شاہ انتقال کر گئے، شائقین غمگین
معروف اداکار ستیش شاہ جو مشہور کامیڈی ڈرامہ ’سرا بھائی ورسس سرا بھائی‘ میں اپنے کردار کے لیے جانے جاتے تھے، 74 سال کی عمر میں انتقال کر گئے۔ ان کا انتقال گردوں کے عارضے کے باعث ہندو جا اسپتال، ممبئی میں ہوا۔
ذرائع کے مطابق، ستیش شاہ کا انتقال 25 اکتوبر کی دوپہر ساڑھے دو بجے ہوا۔ وہ گزشتہ کچھ عرصے سے گردے کی بیماری میں مبتلا تھے اور حال ہی میں ٹرانسپلانٹ سرجری بھی کروا چکے تھے۔
ان کے مینیجر نے بتایا کہ مرحوم کی آخری رسومات اتوار کو ادا کی جائیں گی۔
ستیش شاہ نے چالیس سال سے زائد عرصے پر محیط اپنے فنی سفر میں بے شمار یادگار کردار ادا کیے۔ فلم ’جانے بھی دو یارو‘ میں ان کی شاندار اداکاری نے انہیں گھر گھر مشہور کیا۔
انہوں نے ہم ساتھ ساتھ ہیں، میں ہوں نا، کل ہو نہ ہو، کبھی ہاں کبھی نا، دل والے دلہنیا لے جائیں گے اور اوم شانتی اوم جیسی کامیاب فلموں میں اپنی اداکاری کے جوہر دکھائے۔
ستیش شاہ کا انتقال بھارتی انٹرٹینمنٹ انڈسٹری کے لیے ایک بڑے نقصان کے طور پر دیکھا جا رہا ہے۔ ان کے چاہنے والے سوشل میڈیا پر گہرے دکھ کا اظہار کر رہے ہیں۔
