بھارت اور اسرائیل کا بڑا فیصلہ دہشت گردی کے خلاف اتحاد، تجارت میں نیا دور شروع
بھارت اور اسرائیل نے باہمی تعلقات کو مزید مضبوط بنانے، دہشت گردی کے خاتمے اور تجارتی تعاون بڑھانے پر اتفاق کیا۔ دونوں ممالک کے وزرائے خارجہ ڈاکٹر ایس جے شنکر اور گیڈیون ساعر کے درمیان نئی دہلی میں اہم ملاقات ہوئی، جس میں علاقائی امن، انفراسٹرکچر، اور کنیکٹیویٹی جیسے موضوعات پر بھی بات چیت کی گئی۔
ملاقات میں دونوں رہنماؤں نے اس بات پر زور دیا کہ دنیا بھر میں دہشت گردی کے لیے صفر برداشت کی پالیسی اپنائی جائے۔ جے شنکر نے کہا کہ بھارت اور اسرائیل نے مشکل وقتوں میں ایک دوسرے کا ساتھ دیا ہے، اور یہ تعلق باہمی اعتماد پر قائم ہے۔
اسرائیلی وزیر نے کہا کہ ان کا ملک حماس، حزب اللہ اور حوثیوں جیسے انتہا پسند گروپوں سے نمٹنے کے لیے پرعزم ہے۔ انہوں نے وزیراعظم نریندر مودی کے تعاون کو بھی سراہا، جنہوں نے گزشتہ سال 7 اکتوبر کے حملے کے بعد اسرائیل کی حمایت کی تھی۔
جے شنکر نے کہا کہ بھارت، غزہ امن منصوبے کی حمایت کرتا ہے اور امید ظاہر کی کہ اس سے پائیدار امن قائم ہو گا۔
دونوں وزراء نے زراعت، معیشت، سیاحت، سائبر ٹیکنالوجی اور سیمی کنڈکٹرز کے شعبوں میں اشتراک بڑھانے پر بھی اتفاق کیا۔
