جوبلی ہلز ضمنی انتخاب میں بے ضابطگیوں کا معاملہ

تلنگانہ میں جوبلی ہلز اسمبلی ضمنی انتخاب کے دوران مبینہ الیکٹورل دھاندلی کے الزامات پر بی آر ایس پارٹی نے سخت ردعمل ظاہر کیا ہے۔ پارٹی کے ورکنگ صدر کے ٹی راما راؤ نے اعلان کیا کہ وہ تلنگانہ ہائی کورٹ میں پٹیشن دائر کریں گے تاکہ معاملے کی تحقیقات اور کارروائی ہو سکے۔

راما راؤ نے الزام لگایا کہ ریونت ریڈی کی حکومت نے ووٹر لسٹ میں 23 ہزار سے زائد مشکوک ووٹرز شامل کیے ہیں۔ انہوں نے کہا کہ الیکشن کمیشن آف انڈیا (ای سی آئی) نے شکایات پر کوئی کارروائی نہیں کی، جس سے جمہوری شفافیت پر سوالات اٹھ رہے ہیں۔

تلنگانہ بھون میں پریزنٹیشن دیتے ہوئے راما راؤ نے کہا کہ بی آر ایس ٹیم نے دو دن کی فیلڈ ویریفکیشن میں ہزاروں جعلی ووٹ دریافت کیے — بعض گھروں میں 30 سے 250 ووٹرز درج پائے گئے، جبکہ کئی پتے موجود ہی نہیں تھے۔

انہوں نے انکشاف کیا کہ کانگریس رہنما کے گھر پر 32 جعلی ووٹرز درج ہیں، جب کہ ایک عمارت میں 43 ووٹ رجسٹر کیے گئے جہاں کوئی رہتا ہی نہیں۔ ایک شخص کے تین مختلف ووٹر آئی ڈی بھی پائے گئے۔

راما راؤ نے الزام لگایا کہ کانگریس نے بو تھ لیول افسروں کے ساتھ مل کر "چور ووٹ” تیار کیے ہیں۔ انہوں نے کہا کہ اگر راہل گاندھی واقعی جمہوریت کے لیے فکرمند ہیں تو انہیں تلنگانہ میں ووٹ چوری پر بھی بات کرنی چاہیے۔

انہوں نے اعلان کیا کہ بی آر ایس اس مسئلے کو عدالت، الیکشن کمیشن اور عوام کے سامنے لے جائے گی تاکہ "تلنگانہ کی جمہوریت چوری نہ ہو”۔