جڈچرلہ میں پرائیویٹ بس کا کیمیکل ٹینکر سے تصادم بڑی تباہی سے محفوظ

جڈچرلہ کے ماچرم فلائی اوور پر جمعرات کی صبح ایک خطرناک واقعہ پیش آیا جب ایک پرائیویٹ ٹراولس کی بس سامنے جارہی کیمیکل ٹینکر سے ٹکرا گئی۔ تصادم کے بعد ٹینکر سے ہائیڈروکلورائڈ ایسڈ بہہ نکلا، لیکن خوش قسمتی سے تمام 26 مسافر محفوظ رہے۔

بس چتور (آندھرا پردیش) سے حیدرآباد آرہی تھی کہ اچانک ٹینکر سے ٹکرا گئی۔ حادثے کے فوراً بعد بس ڈرائیور نے مسافروں کو باہر نکلنے کی ہدایت دی، جس کے باعث بھگدڑ میں کچھ افراد کو ہلکی چوٹیں آئیں۔ حکام کے مطابق بہہ نکلنے والا کیمیکل جلنے والا نہیں تھا، جس کی وجہ سے ایک بڑی تباہی ٹل گئی۔

فائر ڈیپارٹمنٹ کے عملے نے فوری طور پر موقع پر پہنچ کر صورتحال پر قابو پایا اور کیمیکل کے پھیلاؤ کو روکنے کے لئے اقدامات کیے۔ حادثے کے باعث این ایچ 44 پر ٹریفک کچھ دیر کے لئے متاثر ہوا۔

بعد ازاں تمام مسافروں کو ایک دوسری بس میں منتقل کیا گیا تاکہ وہ اپنی حیدرآباد کی سفر جاری رکھ سکیں۔

اس واقعہ نے ایک بار پھر سڑک حادثات، کیمیکل ٹرانسپورٹ اور مسافروں کی سلامتی کے بارے میں سوالات کھڑے کر دیے ہیں، جبکہ شہریوں نے حکام سے ٹینکرز کی سخت نگرانی کا مطالبہ کیا ہے۔