جوبلی ہلز انتخاب کانگریس پر ضابطہ اخلاق کی خلاف ورزی کا الزام
جوبلی ہلز ضمنی انتخاب کی مہم کے اختتام کے چند گھنٹوں بعد کانگریس پارٹی پر ضابطہ اخلاق کی خلاف ورزی کے الزامات لگائے گئے ہیں۔ سوشل میڈیا پر ویڈیوز اور تصاویر وائرل ہو رہی ہیں جن میں دعویٰ کیا گیا ہے کہ کانگریس کے رہنما مہم جاری رکھتے ہوئے رقم اور ساڑیاں تقسیم کر رہے تھے۔
ذرائع کے مطابق ایک ویڈیو میں ناگر کرنول کے کانگریس ایم پی مالو روی اپنے ساتھیوں کے ساتھ رحمت نگر کے ایس پی آر ہلز علاقے میں رات 9 بجے کے قریب نظر آ رہے ہیں، حالانکہ پولیس کمشنر وی سی سجنار نے شام 5 بجے سے دفعہ 144 نافذ ہونے کا اعلان کیا تھا۔
ایک اور ویڈیو میں یوسف گوڑہ میں کانگریس کے انتخابی مناظر بڑی اسکرین پر چلتے دکھائے گئے ہیں، جبکہ بورابنڈہ میں خواتین کو ساڑیاں دی جا رہی ہیں۔
رپورٹس کے مطابق پولیس نے اری گڈہ کے ایک ہوٹل پر چھاپہ مارا، جہاں مبینہ طور پر رقم تقسیم کی جا رہی تھی۔ اس کارروائی میں 11 افراد کو حراست میں لیا گیا، تاہم رات دیر تک سرکاری تصدیق نہیں ہو سکی۔
دوسری جانب بی آر ایس کے ترجمان کرشنک منّے نے ایک ویڈیو شیئر کرتے ہوئے الزام لگایا کہ کانگریس نے اری گڈہ کے مسلم رہنما شریف بھائی کو دھمکایا، جس سے ان کی طبیعت بگڑ گئی۔
