ایم جی این ریگا بچاؤ سنگرام یاترا، کانگریس کا تین روزہ احتجاجی مارچ
کانگریس پارٹی نے مرکز کی جانب سے مہاتما گاندھی نیشنل رورل ایمپلائمنٹ گارنٹی ایکٹ کو کمزور کرنے کے خلاف ایم جی این ریگا بچاؤ سنگرام یاترا کا آغاز کیا۔ یہ تین روزہ احتجاجی مارچ حیدرآباد میں چارمینار سے شروع ہوا اور پورانا پل تک پہنچا، جبکہ دوسرے مرحلے میں یکوت پورہ سے سنتوش نگر ایکس روڈس تک ریلی نکالی گئی۔
یہ مہم انڈین نیشنل کانگریس کی ملک گیر تحریک کا حصہ ہے، جس کا مقصد آئینی حقِ روزگار کا تحفظ اور دیہی مزدوروں کے مفادات کا دفاع ہے۔ اس یاترا میں آل انڈیا کانگریس کمیٹی کے سکریٹری سچن سوانت اور سابق تلنگانہ پردیش کانگریس کمیٹی صدر وی ہنمنتھا راؤ سمیت کئی سینئر قائدین شریک ہوئے۔
تقریب سے خطاب کرتے ہوئے ہنمنتھا راؤ نے کہا کہ مرکز کی حکومت ایم جی این ریگا کی روح کو ختم کرنے کی کوشش کر رہی ہے۔ انہوں نے کہا کہ یہ قانون دیہی خاندانوں کو روزگار مانگنے کا حق دیتا تھا، جسے اب مرکز کے اختیار میں ایک احسان بنا دیا جا رہا ہے۔
سچن سوانت نے اجرتوں کے عدم تحفظ پر تشویش ظاہر کرتے ہوئے کہا کہ نئی پالیسیوں کے تحت دیہی مزدوروں کو کم اجرت اور غیر محفوظ روزگار پر مجبور کیا جا رہا ہے۔
وہیں حیدرآباد ڈی سی سی صدر سید خالد سیف اللہ نے کہا کہ گرام پنچایتوں کے اختیارات چھین کر ٹھیکیداروں کو دیے جا رہے ہیں، جس سے مقامی مزدور حقوق سے محروم ہو رہے ہیں۔
کانگریس قائدین نے ایم جی این ریگا کو دیہی ہندوستان کی لائف لائن قرار دیتے ہوئے کہا کہ اس اسکیم نے کروڑوں انسان دنوں کا روزگار فراہم کیا اور خواتین، ایس سی، ایس ٹی طبقات کو مضبوط بنایا۔ یاترا میں کارکنان، عوام اور پارٹی کیڈر نے جوش و خروش سے شرکت کی اور اسکیم کے تحفظ کا عزم دہرایا۔
