دارالحکومت دہلی کے لال قلعہ میٹرو اسٹیشن کے قریب ہوئے دھماکے کی سی سی ٹی وی فوٹیج سامنے آگئی ہے، جس میں دھماکے کا عین لمحہ صاف نظر آ رہا ہے۔ عام سی شام چند سیکنڈز میں افراتفری میں بدل گئی۔
فوٹیج میں دیکھا جا سکتا ہے کہ سڑک پر گاڑیاں، بائیکس اور بسیں معمول کے مطابق چل رہی تھیں کہ اچانک ایک تیز روشنی اور آگ کا شعلہ پوری اسکرین پر چھا گیا۔ دھماکے کے فوراً بعد لوگ گھبرا کر بھاگنے لگے اور دھواں ہر طرف پھیل گیا۔
اطلاعات کے مطابق دھماکہ پیر کی شام تقریباً 6:50 بجے ہوا۔ تحقیقاتی ٹیم نے تصدیق کی کہ دھماکہ ایک ہنڈائی i20 کار سے ہوا جو سگنل کے قریب آہستہ چل رہی تھی۔ جیسے ہی گاڑی رکی، اچانک دھماکہ ہوا جس سے قریبی علاقہ دہل گیا۔
پولیس کے مطابق یہ واقعہ اُس وقت سامنے آیا جب چند گھنٹے پہلے ہی آٹھ افراد کو گرفتار کیا گیا، جن میں تین ڈاکٹرز بھی شامل ہیں، اور 2,900 کلو بارود برآمد کیا گیا تھا۔ یہ گروہ جیشِ محمد اور انصار غزوۃ الہند سے منسلک بتایا جا رہا ہے۔
