متحدہ عرب امارات میں ایک بار پھر غیر معمولی بارش نے نظامِ زندگی کو متاثر کر دیا، جس کے نتیجے میں درجنوں پروازیں منسوخ یا تاخیر کا شکار ہو گئیں جبکہ دبئی، شارجہ اور دیگر شہروں کی کئی سڑکیں زیرِ آب آ گئیں۔
جمعہ کی صبح شارجہ کی مرکزی شاہراہ مکمل طور پر پانی میں ڈوب گئی، جہاں مقامی باشندے ننگے پاؤں پانی میں چلتے نظر آئے۔ ایک شخص کو پانی سے بھری سڑک پر سائیکل چلاتے بھی دیکھا گیا، جہاں پانی پہیوں کی اونچائی تک پہنچ چکا تھا۔
دبئی کی امارات ایئرلائن نے خراب موسم کے باعث ۱۳ پروازیں منسوخ کر دیں، جبکہ شارجہ ایئرپورٹ پر بھی متعدد پروازوں میں تاخیر اور منسوخی کی اطلاعات ملیں۔ رات بھر ہونے والی بارش کے ساتھ تیز گرج چمک اور آسمانی بجلی نے شہریوں کو نیند سے بیدار کر دیا۔
یہ مناظر اپریل ۲۰۲۴ کی یاد دلاتے ہیں، جب ریکارڈ بارشوں کے باعث دبئی میں شدید سیلاب آیا تھا اور دو ہزار سے زائد پروازیں منسوخ کرنی پڑی تھیں۔
بارش سے قبل دبئی پولیس نے شہریوں کو ہدایت دی تھی کہ انتہائی ضرورت کے بغیر گھروں سے باہر نہ نکلیں۔ جمعہ کی صبح پانی نکالنے والی گاڑیاں مختلف علاقوں میں سڑکوں کو صاف کرتی نظر آئیں۔
محکمہ موسمیات کے مطابق ملک بھر میں جمعرات سے جمعہ کے دوران بارش کا امکان ظاہر کیا گیا تھا، جس میں ابوظہبی بھی شامل ہے۔ خلیجی خطے کے دیگر ممالک، بشمول قطر، میں بھی شدید بارش ریکارڈ کی گئی۔
