جے شنکر کا عالمی تعاون پر زور دہشت گردی، معیشت اور ماحولیات سب ایک چیلنج
بھارت کے وزیرِ خارجہ ڈاکٹر ایس جے شنکر نے کہا ہے کہ دنیا کو دہشت گردی، معاشی غیر یقینی صورتحال اور ماحولیاتی تبدیلی جیسے چیلنجوں سے نمٹنے کے لیے مزید مضبوط عالمی تعاون کی ضرورت ہے۔ انہوں نے زور دیا کہ یہ تمام مسائل ایک دوسرے سے جڑے ہوئے ہیں اور کسی ایک ملک کی سرحدوں تک محدود نہیں رہتے۔
انہوں نے یہ بات اقوام متحدہ ٹروپ کانٹریبیوٹنگ کنٹریز چیف کانکلیو سے خطاب کے دوران نئی دہلی میں کہی۔
جے شنکر نے کہا کہ بھارت ہمیشہ سے انصاف، عزت، مواقع اور خوشحالی کے اصولوں پر یقین رکھتا ہے۔ انہوں نے کہا کہ بھارت امن مشنوں کو صرف ایک ذمہ داری نہیں بلکہ اپنی تہذیبی اقدار کا حصہ سمجھتا ہے، کیونکہ بھارت کی سوچ ہے کہ "دنیا ایک خاندان ہے”۔
وزیرِ خارجہ نے مزید کہا کہ آج کے بدلتے جیو پولیٹیکل حالات اور تنازعات کی نوعیت کے سبب اقوام متحدہ امن فوج کے سامنے نئے چیلنجز آ رہے ہیں۔ انہوں نے کہا کہ امن مشنوں کو کامیاب بنانے کے لیے جدید ٹیکنالوجی، سائبر صلاحیت، حفاظتی سازوسامان اور بہتر تیاری میں سرمایہ کاری ضروری ہے۔
