جوبلی ہلز ضمنی انتخابات: حتمی ووٹر لسٹ جاری، ووٹرز میں 1.61 فیصد اضافہ
جوبلی ہلز اسمبلی حلقہ کے آئندہ ضمنی انتخابات کے سلسلے میں جی ایچ ایم سی نے حتمی ووٹر لسٹ جاری کر دی ہے جس میں 1.61 فیصد اضافہ درج کیا گیا ہے۔
اعداد و شمار کے مطابق، جوبلی ہلز اسمبلی حلقہ میں کل 3,98,982 رجسٹرڈ ووٹرز ہیں جن کے لیے 407 پولنگ اسٹیشنز قائم کیے گئے ہیں۔ اس فہرست کی نقول مختلف سیاسی جماعتوں کے نمائندوں کے حوالے کر دی گئی ہیں۔
منگل کے روز جی ایچ ایم سی کمشنر اور ڈسٹرکٹ الیکشن آفیسر آر وی کرناں نے جی ایچ ایم سی ہیڈ آفس میں سیاسی جماعتوں کے نمائندوں کے ساتھ اجلاس منعقد کیا۔
حتمی فہرست کے مطابق، حلقہ میں 2,07,367 مرد ووٹرز، 1,91,590 خواتین ووٹرز اور 25 ووٹرز کو "دیگر” کے زمرے میں شامل کیا گیا ہے۔ ووٹنگ کے لیے 139 عمارتوں میں پولنگ اسٹیشن قائم کیے گئے ہیں۔
کمشنر نے بتایا کہ عوام اپنے نام ای سی آئی ویب سائٹ، سی ای او ویب سائٹ، ای آر او دفتر، ووٹر ہیلپ لائن ایپ اور تمام پولنگ اسٹیشنز پر دستیاب فہرست میں دیکھ سکتے ہیں۔ نقول سیاسی جماعتوں کو بھی فراہم کر دی گئی ہیں۔
اجلاس میں مختلف جماعتوں کے نمائندے بشمول بی ایس پی، بی جے پی، عام آدمی پارٹی، سی پی ایم، کانگریس، بی آر ایس، ٹی ڈی پی اور اے آئی ایم آئی ایم نے شرکت کی۔
