بہار میں انسانیت کو جھنجھوڑ دینے والا واقعہ سامنے آیا ہے، جہاں ایک سڑک حادثے میں تیرہ سالہ بچہ جان سے ہاتھ دھو بیٹھا، مگر موقع پر موجود لوگ مدد کے بجائے مچھلیاں لوٹنے میں مصروف نظر آئے۔
یہ افسوسناک واقعہ ضلع سیتامڑھی کے جاجی ہاٹ گاؤں میں پیش آیا، جو پپری پولیس اسٹیشن کے حدود میں آتا ہے۔ معلومات کے مطابق ریتیش کمار نامی بچہ، جو ساتویں جماعت کا طالب علم تھا، صبح کے وقت ٹیوشن کے لیے جا رہا تھا کہ ایک مچھلیوں سے لدا ٹرک اسے ٹکر مار گیا۔ حادثہ اتنا شدید تھا کہ بچہ موقع پر ہی دم توڑ گیا۔
حادثے کے بعد ٹرک سے مچھلیاں سڑک پر بکھر گئیں، جس کے بعد مقامی لوگ بچے کی لاش ایک طرف پڑی ہونے کے باوجود مچھلیاں اٹھانے لگے۔ حیران کن طور پر وہاں موجود کسی ایک شخص نے بھی ایمبولینس کو اطلاع نہیں دی۔
جب ریتیش کے خاندان کے افراد جائے حادثہ پر پہنچے تو منظر اور بھی دل دہلا دینے والا تھا۔ ایک طرف بچے کی لاش پڑی تھی اور دوسری طرف لوگ مچھلیاں سمیٹنے میں لگے ہوئے تھے۔ اس واقعے کی ویڈیو سوشل میڈیا پر وائرل ہو رہی ہے، جس پر شدید غصے اور افسوس کا اظہار کیا جا رہا ہے۔
یہ واقعہ معاشرے میں گرتی ہوئی اخلاقی اقدار پر ایک بڑا سوالیہ نشان ہے۔
