تلنگانہ میں طوفان مونتھا کی تباہی 12 افراد جاں بحق، 4 لاپتہ
طوفان مونتھا نے تلنگانہ کو شدید متاثر کر دیا۔ مسلسل دو دن کی موسلا دھار بارشوں سے ورنگل، کھمم، نلگنڈہ اور ناگرکرنول کے کئی علاقے زیرِ آب آ گئے۔ اب تک 12 افراد ہلاک، 4 لاپتہ اور تقریباً 4.47 لاکھ ایکڑ زرعی زمین تباہ ہو چکی ہے۔
شدید بارشوں سے ندی نالے اُبل پڑے، اور ہزاروں ایکڑ کھڑی فصلیں برباد ہو گئیں۔ دھان کے ذخائر بھی بہہ گئے جس سے کسانوں کو بھاری نقصان پہنچا۔ کئی مقامات پر سڑکیں ٹوٹ گئیں اور درجنوں دیہات کا رابطہ منقطع ہو گیا۔
ورنگل میں 45 کالونیوں میں گھروں میں پانی بھر گیا، 25 کالونیاں مکمل طور پر زیرِ آب ہیں۔ امدادی ٹیمیں کشتیوں کے ذریعے لوگوں کو نکال رہی ہیں اور اب تک 2,000 سے زائد افراد کو محفوظ مقامات پر منتقل کیا جا چکا ہے۔
وزیر کونڈا شوریکا، ایم پی کاویا، ایم ایل اے نینی راجندر ریڈی اور میئر سدھارانی نے متاثرہ علاقوں کا دورہ کیا اور ریلیف کیمپوں کی نگرانی کی۔
کھمم میں منیرُو ندی کا پانی 26 فٹ تک پہنچ گیا، جس سے بوکالا گڈا، موٹینگر اور نائیڈوپیٹہ علاقے زیرِ آب آ گئے۔ یہاں 520 سے زائد افراد کو 6 ریلیف کیمپوں میں پناہ دی گئی ہے۔
نلگنڈہ اور ناگرکرنول کے قبائلی علاقوں میں بھی حالات خراب ہیں۔ ڈنڈی اور نکالگنڈی پراجیکٹس کے اُبلنے سے کئی قبائلی تھانڈے پانی میں گھر گئے۔ 250 خاندان اپنے گھروں سے بے دخل ہو گئے۔
