بنگلہ دیش میں ہندو نوجوان کا بہیمانہ قتل، پریانکا گاندھی کا اقلیتوں کے تحفظ کا مطالبہ

کانگریس رہنما پریانکا گاندھی واڈرا نے بنگلہ دیش میں ہندو نوجوان کے ہجوم کے ہاتھوں قتل کے واقعے کو انتہائی تشویشناک قرار دیتے ہوئے کہا ہے کہ ہندوستانی حکومت کو پڑوسی ملک میں ہندو، عیسائی اور بدھ اقلیتوں کے تحفظ کا معاملہ سنجیدگی سے اٹھانا چاہیے۔

میڈیا رپورٹس کے مطابق، پچیس سالہ دیپو چندر داس کو توہینِ مذہب کے الزام میں بنگلہ دیش کے شہر میمن سنگھ میں ایک فیکٹری کے باہر ہجوم نے تشدد کا نشانہ بنایا، بعد ازاں اسے درخت سے لٹکا کر قتل کیا گیا اور اس کی لاش کو نذرِ آتش کر دیا گیا۔ مقتول ایک فیکٹری مزدور تھا۔

پریانکا گاندھی نے سوشل میڈیا پر کہا کہ کسی بھی مہذب معاشرے میں مذہب، ذات یا شناخت کی بنیاد پر تشدد اور قتل انسانیت کے خلاف جرم ہے۔ انہوں نے زور دیا کہ بنگلہ دیش میں اقلیتوں کے خلاف بڑھتے ہوئے تشدد پر خاموشی اختیار نہیں کی جا سکتی۔

انہوں نے مطالبہ کیا کہ ہندوستانی حکومت بنگلہ دیشی حکام سے اقلیتوں کی جان و مال کے تحفظ کا مسئلہ زور دار طریقے سے اٹھائے۔

ادھر بنگلہ دیش کی عبوری حکومت نے بھی اس واقعے کی مذمت کرتے ہوئے کہا ہے کہ نئے بنگلہ دیش میں ایسے تشدد کی کوئی جگہ نہیں اور ذمہ داروں کو سخت سزا دی جائے گی۔ پولیس کے مطابق واقعے کے بعد علاقے میں کشیدگی پھیل گئی، تاہم صورتحال پر قابو پانے کی کوششیں جاری ہیں۔

واضح رہے کہ شیخ حسینہ کی معزولی کے بعد بنگلہ دیش میں اقلیتی برادریوں کے خلاف واقعات میں اضافہ دیکھا جا رہا ہے، جس پر بین الاقوامی سطح پر بھی تشویش ظاہر کی جا رہی ہے۔