اڑیسہ میں شدید طوفان کا اثر، آندھرا پردیش کے شمالی اضلاع میں موسلادھار بارش

اڑیسہ کے گپال پور علاقے میں شدید طوفان کے ساحل سے ٹکرانے کے بعد بھی اس کے اثرات ختم نہیں ہوئے۔ محکمہ موسمیات وشاکھا پٹنم کے مطابق طوفان شمال مغرب کی سمت بڑھتے ہوئے کمزور ضرور ہوا ہے مگر اس کے اثرات اب بھی برقرار ہیں۔

محکمہ نے خبردار کیا ہے کہ 55 سے 75 کلومیٹر فی گھنٹہ کی رفتار سے تیز ہوائیں چلنے کا امکان ہے جس کے ساتھ شمالی آندھرا پردیش میں موسلادھار بارشیں ہوں گی۔ اس صورتحال کو دیکھتے ہوئے شریکاکلم، پاروتی پورم منیام اور وجیانگرم اضلاع کے لیے ریڈ الرٹ جاری کیا گیا ہے۔

اڑیسہ میں ہونے والی شدید بارش کے بعد شریکاکلم ضلع میں سیلابی صورتحال پیدا ہوگئی ہے۔ بارش کا پانی دریاؤں ونش دھارا، ناگا ولی، بہودا اور مہندر تنیا میں داخل ہو رہا ہے۔ اس کے نتیجے میں ہیرہ منڈلم گوٹا بیراج پر پہلا خطرے کا سگنل جاری کیا گیا ہے۔ ونش دھارا کا پانی نیچے کے علاقوں کی طرف چھوڑا جا رہا ہے جبکہ ناگا ولی دریا میں بھی پانی کی سطح تیزی سے بلند ہو رہی ہے۔

محکمہ موسمیات کے مطابق اگلے کچھ دنوں تک بارش کا سلسلہ جاری رہنے کا امکان ہے اور عوام سے اپیل کی گئی ہے کہ وہ احتیاطی تدابیر اختیار کریں۔