ٹرمپ کا ہنگری کو بڑا تحفہ روسی تیل پر پابندی سے استثنا حاصل
امریکی صدر ڈونالڈ ٹرمپ نے ہنگری کے وزیراعظم وکٹر اوربان کو روسی تیل کی خریداری پر امریکی پابندیوں سے استثنا دے دیا۔ دونوں رہنماؤں کی ملاقات میں توانائی، روس، اور یوکرین جنگ پر تفصیلی بات چیت ہوئی۔
وکٹر اوربان نے کہا کہ ان کا ملک روسی توانائی پر انحصار کرتا ہے، کیونکہ ہنگری ایک بری سے گھرا ہوا ملک ہے جس کے پاس کوئی سمندری راستہ نہیں۔ انہوں نے واضح کیا کہ پائپ لائن کوئی سیاسی مسئلہ نہیں بلکہ زمینی حقیقت ہے۔
ٹرمپ نے کہا کہ یورپی یونین کو چاہیے کہ وہ ہنگری اور اس کے لیڈر وکٹر اوربان کا احترام کرے، کیونکہ انہوں نے امیگریشن کے معاملے پر درست مؤقف اختیار کیا ہے۔
ہنگری کے وزیرِ خارجہ پیٹر سیزیارٹو نے اس فیصلے کو ایک بڑی کامیابی قرار دیتے ہوئے کہا کہ یہ فیصلہ ہنگری کی توانائی سلامتی کو یقینی بنائے گا۔
ٹرمپ کے اقتدار میں واپسی کے بعد اوربان کی یہ پہلی وائٹ ہاؤس ملاقات تھی۔ ماہرین کے مطابق یہ ملاقات اوربان کے لیے سیاسی طور پر ایک بڑی جیت ہے، جو آئندہ انتخابات میں ان کے لیے فائدہ مند ثابت ہو سکتی ہے۔
ٹرمپ نے کہا کہ ہنگری کو روسی تیل پر استثنا دینا اس لیے ضروری ہے کیونکہ ان کے پاس سمندر نہیں ہے، اور انہیں پائپ لائن سے ہی توانائی حاصل کرنی ہوتی ہے۔
