حیدرآباد میں میٹرو زون میں 4,051 کروڑ کا زیرِ زمین کیبلنگ منصوبہ منظور
تلنگانہ حکومت نے ٹی جی ایس پی ڈی سی ایل کے چار ہزار اکیاون کروڑ روپے کے بڑے منصوبے کی منظوری دے دی ہے، جس کے تحت حیدرآباد میٹرو زون میں موجود اوور ہیڈ تاروں کو زیرِ زمین کیبلنگ میں تبدیل کیا جائے گا۔ حکومت نے اس فیصلے کے لیے جی او 43 جاری کیا ہے۔
اس منصوبے کا مقصد بجلی کی سپلائی کو زیادہ محفوظ، معیاری اور قابلِ اعتماد بنانا ہے، جبکہ مرمت کا خرچ بھی نمایاں طور پر کم ہو جائے گا۔ حکام کے مطابق یہ اقدام صنعتوں اور نئی سرمایہ کاری کو بھی حوصلہ دے گا۔
منصوبے کے اخراجات ٹی جی ایس پی ڈی سی ایل کے اندرونی فنڈز یا قرض سے پورے کیے جائیں گے۔ ساتھ ہی ٹیلی کام، انٹرنیٹ سروس پرووائیڈرز اور ٹی-فائبر بھی اس میں شیئرنگ کی بنیاد پر شامل ہوں گے۔
کمپنی نے حکومت کو پیش کردہ ڈی پی آر میں بتایا کہ یہ کام بنجرہ ہلز سرکل، سکندرآباد سرکل، حیدرآباد سینٹرل اور ساوتھ سرکل میں کیا جائے گا۔ مرکزی سڑکوں پر 33 کلو وولٹ، 11 کلو وولٹ اور ایل ٹی کی پوری نیٹ ورک لائن زیرِ زمین ڈالی جائے گی، جبکہ تنگ گلیوں میں اے بی کیبل استعمال کی جائے گی تاکہ کام آسان اور محفوظ طریقے سے مکمل ہو سکے۔
دوسری جانب حکومت نے ٹی جی آر ای ڈی سی او کو پانچ سال میں تین ہزار میگاواٹ شمسی توانائی خریدنے کی اجازت بھی دے دی ہے تاکہ ریاست اپنے رینیوایبل کنزمپشن آبلیگیشن کو پورا کر سکے۔ یہ خریداری تین مرحلوں میں 2026 تا 2027 مکمل کی جائے گی۔
