ٹرمپ کا بڑا بیان: میں بھارت کے ساتھ تجارتی معاہدہ کر رہا ہوں

امریکی صدر ڈونلڈ ٹرمپ نے بدھ کے روز اعلان کیا کہ امریکہ اور بھارت کے درمیان ایک نیا تجارتی معاہدہ تیار کیا جا رہا ہے۔ وہ جنوبی کوریا کے شہر گیونگجو میں منعقدہ اے پیک سی ای او سمٹ سے خطاب کر رہے تھے۔
ٹرمپ نے کہا کہ اُنہیں وزیرِ اعظم نریندر مودی سے بہت عزت اور محبت ہے اور دونوں ممالک کے تعلقات بہت مضبوط ہیں۔

انہوں نے مودی کو “بہت اچھا انسان” اور “سخت مگر سمجھدار لیڈر” قرار دیا۔ تاہم، ٹرمپ نے دعویٰ کیا کہ انہوں نے حالیہ بھارت۔پاکستان کشیدگی کو روکنے میں اہم کردار ادا کیا۔ اُن کے مطابق، “میں نے مودی سے کہا کہ جب تک پاکستان سے لڑائی جاری ہے، ہم کوئی تجارتی معاہدہ نہیں کریں گے۔”

ٹرمپ نے مزید بتایا کہ انہوں نے پاکستانی آرمی چیف فیلڈ مارشل عاصم منیر سے بھی بات کی، جنہیں انہوں نے “بہادر اور اچھا انسان” کہا۔
ان کا کہنا تھا کہ دونوں ممالک ایٹمی طاقت رکھتے ہیں، اس لیے امریکہ کسی خطرے میں پڑنے والا فیصلہ نہیں کرے گا۔

یہ بیان ایسے وقت میں آیا ہے جب امریکہ نے بھارت پر 50 فیصد ٹیرف عائد کیا ہے، جس میں روسی تیل کی خریداری پر اضافی 25 فیصد ٹیکس شامل ہے۔

ذرائع کے مطابق، بھارت اور امریکہ کے درمیان تجارتی معاہدہ تقریباً مکمل ہونے کے قریب ہے، اور اگلے مرحلے کی بات چیت جلد ختم ہونے کی توقع ہے۔