بھارت نے کابل میں اپنا ٹیکنیکل مشن باضابطہ طور پر سفارتخانہ بنا دیا
بھارت نے کابل میں اپنے ٹیکنیکل مشن کو باضابطہ طور پر سفارتخانے کا درجہ دے دیا ہے۔ یہ فیصلہ طالبان حکومت کے ساتھ تعلقات کو فروغ دینے کے مقصد سے کیا گیا ہے، تاہم بھارت نے ابھی تک طالبان حکومت کو باضابطہ طور پر تسلیم نہیں کیا۔
بھارتی وزارتِ خارجہ نے اپنے بیان میں کہا کہ یہ فیصلہ افغان وزیرِ خارجہ امیر خان متقی کے حالیہ دورۂ بھارت کے بعد کیا گیا۔ متقی کا یہ پہلا باضابطہ دورہ تھا، جس کے دوران دونوں ممالک کے درمیان باہمی تعلقات پر بات چیت ہوئی۔
بیان میں کہا گیا کہ بھارت کا کابل میں سفارتخانہ افغانستان کی ترقی، انسانی امداد اور استعداد بڑھانے کے منصوبوں میں اپنا کردار مزید مضبوط کرے گا۔
یاد رہے کہ اگست 2021 میں طالبان کے اقتدار میں آنے کے بعد بھارت نے کابل سے اپنے تمام اہلکار واپس بلا لیے تھے۔ تاہم جون 2022 میں بھارت نے ایک ٹیکنیکل ٹیم کے ذریعے اپنی موجودگی دوبارہ قائم کی تھی۔
افغان وزیرِ خارجہ متقی نے کہا کہ افغانستان بھی نئی دہلی میں اپنے سفارتکار بھیجے گا تاکہ دونوں ممالک کے درمیان تعلقات کو مزید آگے بڑھایا جا سکے۔ انہوں نے یقین دلایا کہ افغانستان کی سرزمین کسی بھی ملک کے خلاف استعمال نہیں ہونے دی جائے گی۔
