بجٹ اجلاس کا آغاز، بھارت اصلاحاتی ایکسپریس پر تیزی سے آگے بڑھ رہا ہے وزیرِ اعظم مودی
بھارت کی پارلیمنٹ کے بجٹ اجلاس کے آغاز پر وزیرِ اعظم نریندر مودی نے کہا کہ یہ اجلاس ملک کی ترقی کے لیے ایک فیصلہ کن مرحلے کی شروعات ہے۔ انہوں نے واضح کیا کہ سن دو ہزار سینتالیس تک ترقی یافتہ بھارت کے ہدف کو حاصل کرنے کے لیے آنے والے پچیس سال نہایت اہم ہیں۔
پارلیمنٹ کے باہر میڈیا سے بات کرتے ہوئے وزیرِ اعظم نے کہا کہ صدر دروپدی مرمو کے خطاب میں چودہ کروڑ عوام کا اعتماد اور نوجوانوں کی امنگیں جھلکتی ہیں۔ انہوں نے کہا کہ صدر کی رہنمائی کو اراکینِ پارلیمنٹ کو سنجیدگی سے لینا چاہیے کیونکہ یہ اجلاس ملک کے مستقبل کے رخ کا تعین کرے گا۔
وزیرِ اعظم مودی نے کہا کہ یہ بجٹ اجلاس اکیسویں صدی کے پہلے حصے کی تکمیل اور دوسرے حصے کے آغاز کی علامت ہے، اور یہی وقت ہے جب بھارت کو مضبوط بنیادوں پر آگے بڑھانا ہوگا۔
انہوں نے بھارت۔یورپی یونین آزاد تجارتی معاہدے کو ایک بڑی کامیابی قرار دیتے ہوئے کہا کہ اس سے کارخانوں، کسانوں، ماہی گیروں اور خدماتی شعبے کو عالمی منڈیوں تک رسائی ملے گی۔ انہوں نے صنعتوں سے اپیل کی کہ وہ معیار اور مسابقت پر خصوصی توجہ دیں۔
وزیرِ اعظم نے حکومت کی شناخت کو اصلاح، کارکردگی اور تبدیلی قرار دیتے ہوئے کہا کہ بھارت تیزی سے اصلاحاتی ایکسپریس پر آگے بڑھ رہا ہے۔ انہوں نے زور دیا کہ حکومت طویل مسائل کے بجائے طویل مدتی حل کی طرف بڑھ رہی ہے جس سے عالمی اعتماد مضبوط ہوتا ہے۔
