کیلیفورنیا میں خوفناک حادثہ، بھارتی نژاد ٹرک ڈرائیور گرفتار
کیلیفورنیا میں پیش آئے ایک خوفناک ٹریفک حادثے میں بھارتی نژاد ٹرک ڈرائیور کو تین افراد کی ہلاکت کے الزام میں گرفتار کر لیا گیا۔
اطلاعات کے مطابق، 21 سالہ جَشن پریت سنگھ، جو امریکہ میں غیر قانونی طور پر مقیم تھا، نے ایک ٹرک حادثے میں آٹھ گاڑیوں کو ٹکر ماری، جس کے نتیجے میں تین افراد جاں بحق اور متعدد زخمی ہوگئے۔
یہ حادثہ منگل کی دوپہر اونٹیریو کے قریب 10 فری وے پر پیش آیا۔ پولیس رپورٹ کے مطابق، ٹرک ڈرائیور شراب کے نشے میں تھا اور غفلت برتنے کے باعث چَین ری ایکشن ٹکر ہوئی، جس نے پورے ہائی وے کو آگ کی لپیٹ میں لے لیا۔
پولیس نے بتایا کہ جَشن پریت سنگھ پر غیر ارادی قتل اور نشے کی حالت میں گاڑی چلانے کے الزامات عائد کیے گئے ہیں۔
حادثے کے فوراً بعد فائر بریگیڈ اور ریسکیو ٹیموں نے موقع پر پہنچ کر آگ پر قابو پایا اور زخمیوں کو قریبی اسپتال منتقل کیا۔
ابتدائی تحقیقات کے مطابق، ڈرائیور نے اپنی رفتار پر قابو کھو دیا تھا جس کی وجہ سے یہ بڑا حادثہ پیش آیا۔
پولیس نے معاملے کی مزید تفتیش شروع کر دی ہے۔
