تلنگانہ میں خوشی کی لہر: گروپ-2 امیدواروں کو تقرری کے احکامات جاری
تلنگانہ کے سیکڑوں امیدواروں کے لیے ہفتے کا دن تاریخی ثابت ہوا، جب چیف منسٹر اے۔ ریونت ریڈی نے تلنگانہ اسٹیٹ پبلک سروس کمیشن (ٹی ایس پی ایس سی) کے گروپ-2 امتحانات میں کامیاب 783 امیدواروں کو تقرری کے احکامات حوالے کیے۔
شیلپکلا ویدیکا میں منعقدہ اس تقریب میں ماحول خوشی، راحت اور جذبات سے بھرپور رہا۔ برسوں کی انتظار، تاخیر اور بے چینی کے بعد، منتخب امیدواروں نے اس لمحے کو محنت اور صبر کا صلہ قرار دیا۔
ایک کامیاب امیدوار بانسری روہن، جو اب سب رجسٹرار کے عہدے پر فائز ہوں گے، نے کہا:
"برسوں کے انتظار کے بعد حکومت کا شکریہ ادا کرتے ہیں کہ امتحان کے ایک سال کے اندر تقرری کے احکامات جاری کیے۔ آج واقعی یقین نہیں آتا کہ ہماری محنت رنگ لائی۔”
دور دراز علاقوں سے تعلق رکھنے والے امیدواروں کے لیے یہ کامیابی مزید معنی رکھتی ہے۔ شیوا کمار، جو ڈپٹی تحصیلدار کے طور پر خدمات انجام دیں گے، نے کہا:
"ملوگُو جیسے پسماندہ علاقے سے آنا آسان نہیں تھا، مگر آج فخر محسوس ہو رہا ہے۔”
ایک اور امیدوار این۔ شروان (اسسٹنٹ سیکشن آفیسر) نے کہا کہ حکومت نے بروقت فیصلہ کر کے امیدواروں کے اعتماد کو بحال کیا ہے۔
ایس۔ پورناچندر، جو ڈپٹی تحصیلدار کے طور پر منتخب ہوئے، نے کہا:
"تین سال کے طویل انتظار کے بعد اب ہم تلنگانہ کی ترقی میں کردار ادا کرنے کے لیے تیار ہیں۔”
یہ دن صرف انفرادی کامیابی نہیں بلکہ عوامی خدمت کے نئے سفر کی شروعات ہے۔
