جوبلی ہلز شکست پر کویتا کا معنی خیز پیغام کرما لوٹ آتا ہے

جوبلی ہلز ضمنی انتخاب میں بی آر ایس کی شکست کے بعد پارٹی کی سابق رہنما کے کویتا کا مختصر مگر تیکھا ردعمل سامنے آیا۔ انہوں نے ایک معنی خیز پیغام میں کہا: کرما واپس آتا ہے۔

کویتہ، جو سابق وزیر اعلیٰ کے چندر شیکھر راؤ (کے سی آر) کی بیٹی ہیں، نے یہ تبصرہ اس وقت کیا جب برسرِ اقتدار کانگریس نے یہ نشست بی آر ایس سے چھین لی۔ یہ حلقہ بی آر ایس ایم ایل اے مگنٹی گوپناتھ کے انتقال کے بعد خالی ہوا تھا۔

بی آر ایس کے لیے یہ شکست اس لیے بھی بھاری جھٹکا سمجھی جا رہی ہے کہ پارٹی پہلے ہی اقتدار سے محرومی اور لوک سبھا انتخابات میں مکمل ناکامی سے گزر رہی ہے۔

کویتہ نے ستمبر میں پارٹی سے معطلی کے بعد بی آر ایس سے استعفیٰ دے دیا تھا۔ ان پر مبینہ غیر جماعتی سرگرمیوں کا الزام لگایا گیا تھا۔ معطلی کے بعد انہوں نے تلنگانہ جاگرتھی کے پلیٹ فارم سے چار ماہ کی پدیاترا شروع کی، جو ان کی پہلی عوامی سرگرمی ہے۔

کویتہ نے واضح کیا کہ وہ عوامی مسائل پر کام جاری رکھیں گی مگر سیاست میں واپسی بعد میں کریں گی۔ انہوں نے کہا:
وقت آنے پر میں دکھاؤں گی کہ سیاست میں خواتین کی قیادت کیسی ہوتی ہے۔

انہوں نے یہ بھی کہا کہ وہ بی آر ایس میں واپس نہیں جائیں گی۔
اگر کے سی آر مجھے بطور والد بلائیں تو ضرور جاؤں گی، لیکن پارٹی میں واپسی کا کوئی سوال ہی نہیں۔

یہ بھی یاد رہے کہ کویتا نے اپنے کزن ٹی ہریش راؤ اور سنتوش کمار پر سنگین بدعنوانی کے الزامات لگائے تھے، جس کے بعد ہی انہیں معطل کیا گیا۔