انسان اور جنگلی حیات کے تصادم پر قابو پانے کیلئے کرناٹک میں جدید کمانڈ سینٹر کا آغاز
کرناٹک میں انسان اور جنگلی حیات کے تصادم کے بڑھتے واقعات کے پیشِ نظر محکمہ جنگلات کرناٹک نے ایک اہم قدم اٹھاتے ہوئے انٹیگریٹڈ کمانڈ اینڈ کنٹرول سینٹر کا آغاز کیا ہے۔ اس جدید مرکز کا افتتاح وزیر جنگلات، ماحولیات و ایکولوجی ایشور کھنڈرے نے آرنیا بھون، ملیشورم میں کیا۔
حالیہ دنوں میں ریاست کے گیارہ جنگلاتی ڈویژنز میں تصادم کے واقعات میں اضافہ دیکھنے میں آیا، جس کے بعد حکومت نے ٹیکنالوجی پر مبنی حل اختیار کرنے کا فیصلہ کیا۔ یہ نیا مرکز مختلف ڈویژنل کمانڈ اینڈ کنٹرول سینٹرز کو ایک ہی نظام سے جوڑے گا، جن میں ایم ایم ہلز، مدیکیری، حسن، چکمگلورو، منگلورو، بنا رگھٹا نیشنل پارک اور پانچ ٹائیگر ریزروز شامل ہیں۔
ڈویژنل مراکز مقامی سطح پر شکایات، مسائل اور فوری ردِعمل فورس کی تعیناتی دیکھتے ہیں، جبکہ مرکزی کمانڈ سینٹر مجموعی طور پر نگرانی، جائزہ اور ڈیٹا تجزیہ کا کام انجام دے گا۔ ایک ہی ڈیش بورڈ کے ذریعے تمام علاقوں کی صورتحال پر نظر رکھ کر جامع حفاظتی اقدامات کیے جائیں گے۔
انہوں نے واضح کیا کہ حکومت تھرمل کیمرے، مصنوعی ذہانت سے لیس کیمرے اور ڈرون سمیت ہر ضروری ٹیکنالوجی فراہم کرنے کیلئے تیار ہے۔ وزیر نے کہا کہ حکومت کا مقصد جانی نقصان اور زخمی ہونے کے واقعات کو مکمل طور پر روکنا ہے اور کرناٹک کو اس معاملے میں مثالی ریاست بنانا ہے۔
