تلنگانہ اسمبلی اجلاس کے سلسلے میں بھارت راشٹر سمیتی کے سربراہ اور اپوزیشن لیڈر کلواکنٹلہ چندرشیکھر راؤ (کے سی آر) کی حیدرآباد آمد نے سیاسی حلقوں میں سرگرمی تیز کر دی ہے۔ پارٹی ذرائع کے مطابق کے سی آر نے واضح کیا ہے کہ وہ 29 دسمبر سے شروع ہونے والے اسمبلی اجلاسوں میں شرکت کریں گے۔ اسی سلسلے میں وہ اتوار کی شام ایرّاویلی فارم ہاؤس سے حیدرآباد کے نندی نگر واقع اپنی رہائش گاہ پہنچے۔
اسمبلی اجلاس سے قبل کے سی آر نے پارٹی قائدین کو اہم ہدایات دیتے ہوئے کہا کہ حکمران کانگریس پارٹی کے ایجنڈے پر گہری نظر رکھی جائے اور ہر معاملے پر مضبوط اور مؤثر جواب دیا جائے۔ انہوں نے خاص طور پر پالمورو-رنگاریڈی لفٹ ایریگیشن منصوبے پر اسمبلی کے اندر اور باہر شدید احتجاج کی اپیل کی۔
قابلِ ذکر ہے کہ حال ہی میں کے سی آر نے ایک پریس کانفرنس میں کانگریس حکومت پر سخت تنقید کی تھی، جس کے جواب میں وزیر اعلیٰ ریونت ریڈی نے بھی کڑا ردعمل دیا۔ اس لفظی جنگ کے بعد یہ پہلا اسمبلی اجلاس ہے، جس کے باعث سیاسی فضا خاصی گرم ہے۔
سیاسی مبصرین کے مطابق آئندہ دنوں میں اسمبلی میں حکمران جماعت اور اپوزیشن کے درمیان تیز و تند بحث، الزامات اور جوابی حملے دیکھنے کو مل سکتے ہیں، جس سے اجلاس نہایت دلچسپ رہنے کا امکان ہے۔
