حکومت نے گھریلو گیس سلنڈروں کی فراہمی کے نظام میں بڑی تبدیلی کرتے ہوئے اعلان کیا ہے کہ اب صارفین کو مکمل کے بجائے جزوی طور پر بھرے ہوئے سلنڈر فراہم کیے جائیں گے۔ اس فیصلے کا مقصد زیادہ سے زیادہ گھروں تک گیس کی دستیابی کو یقینی بنانا ہے۔
تفصیلات کے مطابق روایتی طور پر چودہ اعشاریہ دو کلوگرام گیس والے سلنڈر کی جگہ اب آٹھ سے دس کلوگرام تک گیس فراہم کی جائے گی۔ حکام کا کہنا ہے کہ یہ اقدام گیس کی قلت اور عالمی سطح پر جاری کشیدگی کے باعث سپلائی میں رکاوٹوں کے پیش نظر اٹھایا گیا ہے۔
حکام نے واضح کیا کہ صارفین سے مکمل سلنڈر کی قیمت وصول نہیں کی جائے گی بلکہ انہیں صرف اتنی ہی رقم ادا کرنی ہوگی جتنی مقدار میں گیس فراہم کی جائے گی۔ اس تناسبی قیمت کے نظام سے عوام کو کچھ حد تک ریلیف ملنے کی امید ہے۔
ماہرین کے مطابق یہ فیصلہ عارضی بنیادوں پر کیا گیا ہے تاکہ محدود وسائل کو بہتر طریقے سے تقسیم کیا جا سکے۔ تاہم شہریوں نے خدشہ ظاہر کیا ہے کہ کم مقدار میں گیس ملنے سے انہیں بار بار سلنڈر بھروانا پڑے گا۔
حکومت کی جانب سے اس پالیسی کے مکمل نفاذ اور طریقہ کار سے متعلق مزید تفصیلات جلد جاری کیے جانے کی توقع ہے۔
