اظہرالدین کو اقلیتی بہبود اور پبلک انٹرپرائزز کی ذمہ داری دی گئی
تلنگانہ حکومت نے کابینہ میں تبدیلی کرتے ہوئے سابق کرکٹر اور وزیر ایم ڈی اظہرالدین کو دو اہم وزارتیں اقلیتی بہبود اور پبلک انٹرپرائزز کی ذمہ داری سونپ دی ہے۔
سرکاری اعلامیہ کے مطابق، پبلک انٹرپرائزز کا قلمدان جو پہلے وزیر اعلیٰ کے پاس تھا، اب اظہرالدین کے حوالے کیا گیا ہے، جبکہ اقلیتی بہبود کی وزارت جو پہلے وزیر ادلوری لکشمن کمار کے پاس تھی، وہ بھی اظہرالدین کو دے دی گئی ہے۔
یہ فیصلہ جنرل ایڈمنسٹریشن ڈیپارٹمنٹ کی جانب سے جاری نوٹیفکیشن کے تحت لیا گیا ہے۔
سیاسی حلقوں میں اس تبدیلی کو اہم پیش رفت قرار دیا جا رہا ہے کیونکہ اقلیتی بہبود کی وزارت ہمیشہ ریاستی سطح پر سماجی ہم آہنگی اور ترقیاتی منصوبوں میں اہم کردار ادا کرتی ہے۔
اظہرالدین، جو حال ہی میں کابینہ میں شامل ہوئے تھے، اب دو محکموں کے انچارج بن گئے ہیں۔ مبصرین کا کہنا ہے کہ ان کی تجربہ کاری اور عوامی مقبولیت حکومت کے لیے فائدہ مند ثابت ہو سکتی ہے۔
یہ فیصلہ تلنگانہ میں سیاسی توازن برقرار رکھنے کی ایک کوشش کے طور پر دیکھا جا رہا ہے۔
