کانگریس رہنما سونیا گاندھی نے ہفتہ کے روز وی بی-جی رام جی بل کے ذریعے منریگا کی جگہ نیا قانون لانے پر مودی حکومت کو سخت تنقید کا نشانہ بنایا۔ انہوں نے کہا کہ حکومت نے منریگا کو بلڈوز کر کے کروڑوں غریبوں، کسانوں اور مزدوروں کے مفادات پر سیدھا حملہ کیا ہے۔
ویڈیو بیان میں سونیا گاندھی نے کہا کہ گزشتہ گیارہ برسوں میں حکومت نے بار بار منریگا کو کمزور کرنے کی کوشش کی، حالانکہ کورونا وبا کے دوران یہی اسکیم غریبوں کے لیے زندگی کی ڈور ثابت ہوئی تھی۔ انہوں نے الزام لگایا کہ حال ہی میں حکومت نے نہ صرف مہاتما گاندھی کا نام ہٹایا بلکہ بغیر بحث اور مشاورت کے اس قانون کی ساخت بھی بدل دی۔
انہوں نے یاد دلایا کہ بیس سال پہلے وزیر اعظم منموہن سنگھ کے دور میں یہ قانون پارلیمنٹ میں اتفاق رائے سے منظور ہوا تھا۔ یہ ایک انقلابی قدم تھا جس سے دیہی خاندانوں کو روزگار ملا، ہجرت رکی اور گرام پنچایتیں بااختیار ہوئیں۔ اس قانون کے ذریعے گرام سوراج کے تصور کو عملی شکل دی گئی۔
سونیا گاندھی نے کہا کہ نئے بل میں یہ طے ہوگا کہ کسے، کہاں اور کتنا روزگار ملے گا، اور یہ فیصلے دہلی میں بیٹھ کر کیے جائیں گے، جو زمینی حقیقتوں سے بہت دور ہیں۔
انہوں نے وی بی-جی رام جی بل کو سیاہ قانون قرار دیتے ہوئے کہا کہ لاکھوں کانگریس کارکن اس کے خلاف جدوجہد کے لیے تیار ہیں۔ ان کے مطابق، یہ معاملہ کسی ایک پارٹی کا نہیں بلکہ قومی اور عوامی مفاد کا ہے۔
