کوالالمپور: وزیر اعظم نریندر مودی دو روزہ دورے پر ملائیشیا پہنچ گئے، جہاں انہوں نے دونوں ممالک کے درمیان دفاع، سلامتی، تجارت اور اختراع (Innovation) کے شعبوں میں تعاون کو مزید مضبوط بنانے پر زور دیا۔
دورے سے قبل جاری بیان میں مودی نے کہا کہ ہندوستان اور ملائیشیا کے درمیان تاریخی تعلقات موجود ہیں جو گزشتہ برسوں میں مزید مضبوط ہوئے ہیں۔ انہوں نے ملائیشیا کے وزیر اعظم انور ابراہیم کے ساتھ ملاقات اور تفصیلی بات چیت کے حوالے سے بھی امید ظاہر کی۔
مودی نے کوالالمپور میں منعقدہ ایک کمیونٹی پروگرام میں شرکت کی، جہاں انہوں نے کہا کہ ہندوستان تیزی سے ترقی کر رہا ہے اور دنیا کی ٹاپ 3 معیشتوں کے قریب پہنچ رہا ہے۔ انہوں نے “2047 تک ترقی یافتہ ہندوستان” کے ہدف کو دہراتے ہوئے کہا کہ بیرون ملک مقیم ہندوستانی اس سفر میں اہم کردار ادا کر رہے ہیں۔
اس موقع پر مودی نے ملائیشیا میں مقیم بھارتی کمیونٹی کے کردار کو دونوں ممالک کے درمیان ایک مضبوط رابطہ قرار دیا۔ انہوں نے ملائیشیا میں تمل ثقافت کی مقبولیت کا ذکر کرتے ہوئے کہا کہ تمل روایات اور تعلیمات یہاں بڑے پیمانے پر اثر رکھتی ہیں، اور دونوں ممالک کے ثقافتی تعلقات مزید گہرے کیے جائیں گے۔
(ویقارِ ہند نیوز ڈیسک)
