مودی کا تحفہ چار نئی وندے بھارت ٹرینوں کا آغاز

وزیر اعظم نریندر مودی نے چار نئی وندے بھارت ایکسپریس ٹرینوں کا افتتاح کیا، جو ملک کے مختلف اہم حصوں کو جوڑیں گی۔ نئی ٹرینیں بنارس–کھجوراہو، لکھنؤ–سہارنپور، فیروزپور–دہلی، اور ایرنکولم–بنگلورو روٹس پر چلیں گی۔

مودی نے افتتاحی تقریب سے خطاب میں کہا کہ "وندے بھارت، نامو بھارت اور امرت بھارت” جیسی ٹرینیں ریلوے کے نئے دور کی بنیاد رکھ رہی ہیں۔ انہوں نے کہا کہ انفراسٹرکچر ترقی یافتہ ممالک کی معیشت کی ریڑھ کی ہڈی ہوتا ہے، اور ہندوستان بھی تیزی سے ترقی کی راہ پر گامزن ہے۔

بنارس–کھجوراہو وندے بھارت تقریباً 2 گھنٹے 40 منٹ کا وقت بچائے گی اور وارانسی، الہ آباد، چترکوٹ، اور کھجوراہو جیسے مذہبی و ثقافتی شہروں کو جوڑے گی۔

لکھنؤ–سہارنپور وندے بھارت صرف 7 گھنٹے 45 منٹ میں سفر طے کرے گی، جس سے مرادآباد، بریلی، بجنور اور سہارنپور کے مسافروں کو فائدہ ہوگا۔

فیروزپور–دہلی وندے بھارت 6 گھنٹے 40 منٹ میں پہنچے گی، جو پنجاب اور قومی دارالحکومت کے درمیان تجارت و سیاحت کو فروغ دے گی۔

ایرنکولم–بنگلورو وندے بھارت 2 گھنٹے کم وقت میں کیرالہ، تمل ناڈو اور کرناٹک کے درمیان معاشی و تعلیمی روابط کو مضبوط کرے گی۔

مودی نے کہا کہ یہ ٹرینیں تیز، آرام دہ اور جدید ہیں، جو ملک کے ترقیاتی سفر میں نیا سنگ میل ثابت ہوں گی۔