مرکزی وزیرِ خزانہ نرملہ سیتارمن آج پارلیمنٹ میں مرکزی بجٹ ۲۰۲۶۔۲۷ پیش کریں گی۔ یہ ان کا مسلسل آٹھواں بجٹ ہوگا، جو بھارت کی تاریخ میں ایک نیا ریکارڈ ہے۔ اس سے قبل یہ اعزاز مورا ر جی دیسائی کے پاس تھا جنہوں نے چھ بجٹ پیش کیے تھے۔ بجٹ تقریر لوک سبھا میں صبح گیارہ بجے شروع ہوگی، جس کے بعد اسے راجیہ سبھا میں بھی پیش کیا جائے گا۔
یہ بجٹ ایسے وقت میں آ رہا ہے جب بھارت کی معاشی بنیادیں مضبوط ہیں، تاہم عالمی سطح پر غیر یقینی صورتحال برقرار ہے۔ حال ہی میں پیش کیے گئے اقتصادی سروے کے مطابق رواں مالی سال میں حقیقی جی ڈی پی نمو سات اعشاریہ چار فیصد رہنے کا اندازہ ہے، جس سے بھارت مسلسل چوتھے سال دنیا کی تیز ترین بڑی معیشت بنا ہوا ہے۔
حکومت نے مالی نظم و ضبط پر زور دیتے ہوئے مالی خسارہ گزشتہ سال کے ہدف سے بہتر رکھا اور آئندہ سال کے لیے مزید کمی کا ہدف مقرر کیا ہے۔ اس کے ساتھ ہی بھارت کو گزشتہ برس عالمی درجہ بندی اداروں کی جانب سے بہتر درجہ بندی بھی حاصل ہوئی، جس سے سرمایہ کاروں کا اعتماد بڑھا ہے۔
بجٹ پیش ہونے کے بعد وزیرِ خزانہ میڈیا سے گفتگو بھی کریں گی۔
