نئی دہلی میں بھارتیہ جنتا پارٹی کے ہیڈکوارٹر میں منعقدہ تقریب کے دوران وزیر اعظم نریندر مودی نے نومنتخب قومی صدر نتن نابن کو مبارکباد پیش کی اور ایک اہم سیاسی پیغام دیا۔ وزیر اعظم نے کہا کہ وہ خود ایک پارٹی کارکن ہیں اور پارٹی سے متعلق معاملات میں اب نتن نابن ان کے باس ہوں گے۔
وزیر اعظم مودی نے سابقہ پارٹی صدور کی خدمات کو سراہتے ہوئے کہا کہ ان کی محنت نے پارٹی کو مضبوط بنیاد فراہم کی۔ انہوں نے اس موقع پر کانگریس کی خاندانی سیاست پر بھی نشانہ سادھا اور کہا کہ ملک نے مختلف سیاسی ماڈلز دیکھے، مگر آج بی جے پی کا ماڈل ملک کو استحکام، بہتر حکمرانی اور ترقی کی راہ پر لے جا رہا ہے۔
انہوں نے کہا کہ نتن نابن اس نسل سے تعلق رکھتے ہیں جس نے معاشی، سماجی اور تکنیکی تبدیلیاں قریب سے دیکھی ہیں۔ وزیر اعظم کے مطابق نتن نابن میں جوانی کی توانائی اور تنظیمی تجربہ دونوں موجود ہیں، جو پارٹی کارکنوں کے لیے فائدہ مند ثابت ہوگا۔
وزیر اعظم نے زور دے کر کہا کہ آنے والے اگلے پچیس سال بھارت کے لیے نہایت اہم ہیں، کیونکہ یہی وہ دور ہے جس میں ترقی یافتہ بھارت کی تعمیر ہونی ہے۔ انہوں نے واضح کیا کہ بی جے پی ایک ثقافت اور ایک خاندان ہے، جہاں عہدے بدلتے ہیں مگر نظریات مستقل رہتے ہیں۔
