عثمان ہادی کے قتل کیس میں مرکزی ملزم فیصل کریم مسعود نے سوشل میڈیا پر وائرل ہونے والے ایک ویڈیو پیغام میں قتل میں ملوث ہونے کی سختی سے تردید کی ہے۔ فیصل مسعود کا کہنا ہے کہ وہ اس وقت دبئی میں موجود ہیں اور ان پر لگائے گئے الزامات ایک منظم سازش کا حصہ ہیں۔
ویڈیو بیان میں فیصل مسعود نے کہا کہ میں نے عثمان ہادی کو قتل نہیں کیا، بلکہ مجھے اور میرے خاندان کو جان بوجھ کر نشانہ بنایا جا رہا ہے۔ ان کے مطابق وہ خود کو اس مبینہ انتقامی کارروائی سے بچانے کے لیے دبئی گئے ہیں۔ فیصل نے الزام عائد کیا کہ عثمان ہادی کی موت کے پیچھے جماعت اسلامی سے وابستہ عناصر ہو سکتے ہیں۔
دوسری جانب، عثمان ہادی کے بھائی نے دعویٰ کیا ہے کہ یہ قتل عبوری حکومت کے اندر موجود ایک گروہ کی سازش کا نتیجہ ہے۔ واضح رہے کہ عثمان ہادی کو 12 دسمبر کو ڈھاکہ میں نقاب پوش حملہ آوروں نے گولی مار دی تھی، جبکہ وہ چھ دن بعد سنگاپور کے ایک اسپتال میں دم توڑ گئے۔
ڈھاکہ میٹروپولیٹن پولیس کے مطابق، دو مرکزی مشتبہ افراد ملک سے فرار ہو چکے ہیں اور ان کے بھارت میں داخل ہونے کا شبہ ظاہر کیا گیا تھا۔ تاہم میگھالیہ پولیس اور بی ایس ایف نے ان دعوؤں کو بے بنیاد قرار دیتے ہوئے کہا کہ سرحد پار کرنے کا کوئی ثبوت موجود نہیں۔
ایک سینئر پولیس افسر کے مطابق، ملزمان کی موجودگی سے متعلق کوئی مصدقہ انٹیلی جنس معلومات دستیاب نہیں ہیں، جس سے معاملہ مزید پیچیدہ ہو گیا ہے۔
