نریندر مودی نے کہا ہے کہ مغربی ایشیا میں جاری کشیدگی کے دوران تین لاکھ پچھتر ہزار سے زائد بھارتی شہری بحفاظت وطن واپس آ چکے ہیں، جن میں ایران سے آنے والے تقریباً ایک ہزار افراد بھی شامل ہیں۔
لوک سبھا میں خطاب کرتے ہوئے انہوں نے کہا کہ خلیجی ممالک میں تقریباً ایک کروڑ بھارتی مقیم ہیں، اس لیے اس خطے کی صورتحال بھارت کے لیے نہایت اہم ہے۔ انہوں نے بتایا کہ متاثرہ ممالک میں موجود تمام بھارتیوں کو ضروری مدد فراہم کی گئی اور حکومت نے ہر ممکن اقدامات کیے ہیں۔
وزیر اعظم نے کہا کہ انہوں نے مختلف ممالک کے سربراہان سے رابطہ کر کے بھارتی شہریوں کی حفاظت کو یقینی بنایا۔ ان کے مطابق ان ممالک کی جانب سے بھارتیوں کو مکمل تحفظ کی یقین دہانی کرائی گئی ہے۔
انہوں نے مزید کہا کہ ایران سے واپس آنے والوں میں بڑی تعداد طلبہ کی ہے، جن میں سات سو سے زائد میڈیکل کے طلبہ شامل ہیں۔ خلیجی ممالک میں تعلیمی صورتحال کو مدنظر رکھتے ہوئے دسویں اور بارہویں جماعت کے امتحانات کو بھی منسوخ کیا گیا ہے تاکہ طلبہ کو مشکلات کا سامنا نہ ہو۔
وزیر اعظم نے واضح کیا کہ بحران کے وقت شہریوں کی حفاظت حکومت کی اولین ترجیح ہے اور ہر ممکن مدد فراہم کی جائے گی۔
