وزیر اعظم نریندر مودی نے اٹھارہویں روزگار میلہ کے موقع پر ملک بھر کے نوجوانوں میں اکسٹھ ہزار سے زائد تقرری نامے تقسیم کیے۔ اس موقع پر انہوں نے تقرری ناموں کو قوم سازی کی دعوت قرار دیتے ہوئے نوجوانوں کو آئینِ ہند کے تئیں اپنی ذمہ داریوں کا احساس دلایا۔
ورچوئل خطاب میں وزیر اعظم نے کہا کہ نیا سال نوجوانوں کے لیے نئے مواقع اور نئی شروعات لے کر آیا ہے۔ انہوں نے بسنت پنچمی، پراکرم دیوس اور قومی یومِ رائے دہندگان کا حوالہ دیتے ہوئے کہا کہ یہ ایام نوجوانوں میں حب الوطنی، جمہوری اقدار اور قومی شعور کو مضبوط کرتے ہیں۔
اس تقریب میں مرکزی وزیر جتیندر سنگھ، آئی پی ایس افسران، مرکزی ریزرو پولیس فورس اور دفاعی محکمے کے افسران شریک ہوئے۔ وزیر اعظم نے کہا کہ چوبیس جنوری وہ دن ہے جب آئین نے جن گن من کو قومی ترانہ اور وندے ماترم کو قومی نغمہ تسلیم کیا، جو قومی اتحاد کی علامت ہیں۔
انہوں نے کہا کہ یہ تقرری نامے دفاع، صحت، تعلیم اور توانائی سلامتی جیسے شعبوں کو مضبوط کریں گے۔ وزیر اعظم نے واضح کیا کہ روزگار میلہ حکومت کا ایک مشنی اقدام ہے جس کے ذریعے لاکھوں نوجوانوں کو سرکاری ملازمتیں فراہم کی جا چکی ہیں۔
