نامپلی میں ٹریفک جام، پولیس کی عوام سے نمائش کا دورہ ملتوی کرنے کی اپیل
حیدرآباد پولیس کمشنر وی سی سجنار نے عوام سے اپیل کی ہے کہ وہ نمائش کا دورہ فی الحال ملتوی کریں، کیونکہ نامپلی کے علاقے میں ایک فرنیچر کی دکان میں آگ لگنے کے واقعہ کے بعد ٹریفک کی صورتحال انتہائی متاثر ہو گئی ہے۔
ہفتہ کی دوپہر نامپلی میں واقع ایک چار منزلہ عمارت میں اچانک شدید آگ بھڑک اٹھی، جس کے بعد علاقے میں افراتفری مچ گئی۔ ابتدائی اطلاعات کے مطابق کم از کم چھ افراد کے عمارت میں پھنسے ہونے کا خدشہ ظاہر کیا جا رہا ہے۔ آگ لگنے کے فوراً بعد فائر بریگیڈ، پولیس، گریٹر حیدرآباد میونسپل کارپوریشن اور دیگر محکموں نے ریسکیو آپریشن شروع کر دیا۔
ایم آئی ایم کے ایم ایل سی مرزا رحمت بیگ نے ابتدائی معلومات کا حوالہ دیتے ہوئے بتایا کہ پھنسنے والوں میں ایک آٹو ڈرائیور، ایک چوکیدار، اس کی بیوی اور دو بچے شامل ہو سکتے ہیں۔ عمارت سے اٹھنے والا گھنا دھواں ریسکیو ٹیموں کے لیے شدید مشکلات پیدا کر رہا ہے، جس کے باعث امدادی کارروائیاں سست روی کا شکار ہوئیں۔
پولیس نے واضح کیا ہے کہ نامپلی، اطرافی سڑکوں اور نمائش روڈ پر شدید ٹریفک جام ہے، اس لیے عوام سے گزارش ہے کہ وہ متبادل راستے اختیار کریں اور غیر ضروری سفر سے بچیں۔ صورتحال پر مسلسل نظر رکھی جا رہی ہے۔
