وزیراعظم نریندر مودی منگل کے روز ایتھوپیا پہنچے، جو ان کے تین ملکی دورے کا دوسرا مرحلہ ہے۔ یہ ایتھوپیا کا ان کا پہلا سرکاری دورہ ہے، جو افریقی براعظم کے ساتھ بھارت کے بڑھتے ہوئے تعلقات کی عکاسی کرتا ہے۔ وزیراعظم ابی احمد علی نے ایڈیس ابابا ہوائی اڈے پر ذاتی طور پر وزیراعظم مودی کا استقبال کیا اور خود انہیں ہوٹل تک لے گئے۔ اس دوران دونوں رہنماؤں نے سائنس میوزیم اور فرینڈشپ پارک کا غیر طے شدہ دورہ بھی کیا۔
وزارت خارجہ کے مطابق دورے کے دوران دونوں وزرائے اعظم کے درمیان دوطرفہ تعلقات کے تمام پہلوؤں پر تفصیلی بات چیت متوقع ہے، جس میں تجارت، ترقیاتی شراکت داری اور سفارتی تعاون شامل ہیں۔
اس سے قبل وزیراعظم مودی نے اردن کا دو روزہ دورہ مکمل کیا، جہاں بھارت۔اردن سفارتی تعلقات کے پچھتر سال مکمل ہونے کی تقریبات منعقد ہوئیں۔ ایک غیر معمولی سفارتی روایت کے تحت اردن کے ولی عہد الحسین بن عبداللہ دوم نے خود وزیراعظم مودی کو عمان کے میوزیم تک گاڑی چلا کر لے جانے کا اعزاز حاصل کیا۔ یہ سینتیس برس بعد کسی بھارتی وزیر اعظم کا پہلا دوطرفہ دورہ تھا۔
یہ مناظر وزیراعظم مودی کی مشہور ’’کار سفارت کاری‘‘ کا حصہ سمجھے جا رہے ہیں، جس کے ذریعے وہ عالمی رہنماؤں کے ساتھ ذاتی اعتماد اور قریبی تعلقات کا پیغام دیتے ہیں۔ حال ہی میں روسی صدر ولادیمیر پوتن کے ساتھ ان کا ایک ہی گاڑی میں سفر بھی عالمی توجہ کا مرکز بنا، جسے خودمختار خارجہ پالیسی اور میک اِن انڈیا کے پیغام کے طور پر دیکھا گیا۔
