راجندر نگر جھیل کی مرمت جاری، نومبر تک مکمل کرنے کا حکم
حیدرآباد میں راجندر نگر کی بُم رُکن الدّولہ جھیل کی بحالی کا کام تیزی سے جاری ہے۔ ہائیڈرا کمشنر اے وی رنگناتھ نے افسران کو ہدایت دی ہے کہ جھیل کی مرمت کا کام نومبر کے آخر تک مکمل کیا جائے۔
انہوں نے معائنہ کے دوران بتایا کہ 18 ایکڑ کی یہ تاریخی جھیل قبضوں کی وجہ سے سکڑ کر صرف 4.12 ایکڑ رہ گئی تھی۔ ہائیڈرا کی تشکیل کے بعد، اس ادارے نے پہلی قبضہ مٹاؤ مہم اسی جھیل پر شروع کی اور غیرقانونی تعمیرات کو ہٹا کر جھیل کو اس کی اصل وسعت میں بحال کیا۔
افسران نے بتایا کہ نئے انلٹ، آؤٹ لٹ اور نکاسی آب کے نظام تیار کر دیے گئے ہیں۔ نظام دور کے بند کو چھیڑا نہیں جا رہا بلکہ اسے مزید مضبوط کیا جا رہا ہے۔
جھیل کے کنارے واکنگ ٹریک، بچوں کے کھیل کے علاقے، اوپن جم، بیٹھنے کی جگہیں اور چوبیس گھنٹے سی سی ٹی وی نگرانی کا انتظام بھی کیا جا رہا ہے تاکہ یہ مقام عوام کے لیے محفوظ اور تفریحی بن سکے۔
یہ منصوبہ شہر میں ماحولیاتی بہتری اور پانی کے تحفظ کے لیے ایک اہم قدم سمجھا جا رہا ہے۔
