شاہ علی بندہ دھماکہ پولیس نے افواہیں ختم کردیں، دھماکہ گیس لیک سے ہوا
حیدرآباد کے علاقے شاہ علی بندہ میں گوماتھی الیکٹرانکس میں ہونے والے خوفناک دھماکے نے شہر میں ہلچل مچا دی۔ ابتدائی طور پر سوشل میڈیا پر IED اور ایل پی جی دھماکے کی افواہیں گردش کرتی رہیں، تاہم پولیس نے مکمل تحقیقات کے بعد ان افواہوں کو سختی سے مسترد کر دیا۔
ساؤتھ زون کے ڈی سی پی، کرن کرے نے بتایا کہ تفصیلی جانچ میں یہ بات سامنے آئی ہے کہ دھماکہ کسی بم یا سلینڈر کی وجہ سے نہیں ہوا بلکہ دکان میں رکھے گئے ایک الیکٹرانک سامان سے ہونے والے گیس لیک کے باعث ہوا۔ ان کے مطابق دکان میں تقریباً 15 سے 20 ریفریجریٹر رکھے ہوئے تھے، جن میں سے کسی ایک سے گیس خارج ہوئی، جس نے اچانک تیز آگ بھڑکا دی اور پھر مسلسل چھوٹے بڑے دھماکے ہوتے گئے۔
ڈی سی پی نے واضح کہا کہ "IED یا LPG دھماکے کی خبر غلط ہے”, اصل وجہ صرف گیس لیک ہے۔
حادثے میں دکان کے مالک شیوا کمار بنسل اور ایک موٹر سائیکل سوار سجاد علی بدقسمتی سے جاں بحق ہوگئے، جبکہ آٹھ افراد زخمی ہوئے۔
آگ اتنی شدید تھی کہ دو منزلہ عمارت پوری طرح جل کر خاک ہوگئی۔ دکان کا تمام سامان تباہ ہو گیا، جبکہ ایک کار، آٹو رکشہ اور دو اسکوٹر بھی بُری طرح متاثر ہوئے۔
