سوکر اسٹار رونالڈو کی وائٹ ہاؤس آمد سعودی ولیعہد و ٹرمپ کے ساتھ

امریکی صدر ڈونلڈ ٹرمپ نے وہائٹ ہاؤس میں سعودی ولیعہد شہزادہ محمد بن سلمان کے اعزاز میں پر تکلف ڈنر کا اہتمام کیا، جس میں عالمی فٹبال اسٹار کرِسٹیانو رونالڈو کی غیر متوقع شرکت نے تقریب کی رونق کو دوبالا کر دیا۔

رونالڈو ایسٹ روم کی اگلی قطار میں بیٹھے نظر آئے، جہاں صدر ٹرمپ اور ولیعہد محمد بن سلمان دونوں ملکوں کے اعلیٰ حکام اور تاجر رہنماؤں سے خطاب کر رہے تھے۔ تقریب میں مشہور کاروباری شخصیات بھی موجود تھیں۔

صدر ٹرمپ نے رونالڈو کی عالمی کھیل میں شاندار خدمات کو خراجِ تحسین پیش کیا اور بتایا کہ ان کا بیٹا بیَرَن ٹرمپ رونالڈو کا بڑا مداح ہے۔ صدر نے مسکراتے ہوئے کہا کہ “بیَرَن آج اپنے والد سے زیادہ خوش ہے کیونکہ میں نے اسے رونالڈو سے ملوایا۔”

یہ ولیعہد بن سلمان کا 2018 کے بعد پہلا وہائٹ ہاؤس دورہ تھا، جب دونوں ممالک کے درمیان صحافی جمال خاشقجی کے قتل کے بعد سفارتی کشیدگی پیدا ہو گئی تھی۔ امریکی انٹیلیجنس نے دعویٰ کیا تھا کہ اس واقعے میں شاہی ذمہ داری کا امکان ہے، تاہم ولیعہد نے اس الزام کی تردید کی۔

رونالڈو کا سعودی تعلق

رونالڈو 2022 سے سعودی کلب النصر کی نمائندگی کر رہے ہیں اور سعودی پرو لیگ کے سب سے نمایاں چہرے بن چکے ہیں۔ ان کا سالانہ معاہدہ تقریباً ۲۰۰ ملین ڈالر کا بتایا جاتا ہے۔ جون میں انہوں نے دو سال کی توسیع بھی کی۔

سعودی عرب 2034 کا فٹبال ورلڈ کپ منعقد کرے گا، جس کی مہم میں رونالڈو نے اہم کردار ادا کیا۔ فٹبال اسٹار نے کہا کہ ’’جو میں نے سعودی عرب میں دیکھا، اس سے مجھے یقین ہے کہ 2034 سب سے بہترین ورلڈ کپ ہو گا۔‘‘

رونالڈو آئندہ سال ہونے والے فیفا ورلڈ کپ میں اپنے کیریئر کا چھٹا ورلڈ کپ کھیلیں گے۔