گوا نائٹ کلب میں خوفناک آگ، عملے اور سیاحوں سمیت 23 افراد جاں بحق
گھراؤ، گھٹن اور افراتفری کے دل دہلا دینے والے مناظر
گوا کے ساحلی علاقے آرپورا، نارتھ گوا میں واقع ایک مشہور نائٹ کلب میں ہولناک آگ بھڑک اٹھنے سے کم از کم 23 افراد جاں بحق ہوگئے۔ حکام کے مطابق جاں بحق ہونے والوں میں زیادہ تر عملہ شامل ہے، جبکہ سیاح بھی ہلاک شدگان میں موجود ہیں۔
ابتدائی تحقیقات کے مطابق کلب کی کچن میں گیس سلنڈر پھٹنے سے آگ لگی جو دیکھتے ہی دیکھتے پورے مقام پر پھیل گئی۔ یہ واقعہ ہفتہ اور اتوار کی درمیانی شب پیش آیا۔
گوا پولیس چیف آلک کمار کے مطابق:
“آگ زیادہ تر کچن ایریا میں لگی، لاشیں بھی زیادہ تر وہیں سے ملیں، جس سے ظاہر ہوتا ہے کہ بیشتر افراد عملہ تھا۔”
گوا کے وزیراعلیٰ پرومود ساونت نے بتایا کہ 3 افراد جھلس کر اور باقی گھٹنے سے جاں بحق ہوئے۔
عینی شاہدین کے مطابق علاقے میں افراتفری، دھواں، چیخ و پکار کے مناظر دیکھنے میں آئے۔ بہت سے سیاح باہر نکل آئے، مگر عملہ اندر پھنس گیا۔
ایک گوا ورکر نے کہا:
“میرے کئی دوست وہاں کام کرتے تھے… ان کے فون بند ہیں، دل گھبرا رہا ہے۔”
ریسکیو ٹیموں نے رات بھر آپریشن جاری رکھا۔ کلب کے اندر جلی ہوئی کرسیاں، میزیں، پودے اور تباہ شدہ سامان نظر آیا۔
لاشوں کو گوا میڈیکل کالج، پناجی منتقل کردیا گیا ہے جہاں شناخت جاری ہے۔
وزیراعلیٰ نے اعلان کیا کہ:
تحقیقات شروع کر دی گئی ہیں… غفلت ثابت ہونے پر سخت ترین کارروائی ہوگی۔
وزیر اعظم نریندر مودی نے بھی واقعے کو "انتہائی افسوسناک” قرار دیا۔
گوا، جو اپنی نائٹ لائف، ساحلوں اور ریزورٹس کے لیے مشہور ہے، ہر سال لاکھوں سیاحوں کی میزبانی کرتا ہے۔ ملک میں اس سے پہلے بھی مختلف تفریحی مقامات پر آتشزدگی کے واقعات جانیں لے چکے ہیں۔
