سونبھدرہ میں پتھر کی کان بیٹھ گئی، کئی مزدور دب گئے
اتر پردیش کے ضلع سونبھدرہ میں ایک افسوسناک حادثہ پیش آیا، جہاں پتھر کی کان کا ایک بڑا حصہ اچانک بیٹھ گیا۔ اس حادثے کے بعد کئی مزدور ملبے تلے دبنے کا خدشہ ظاہر کیا گیا ہے۔ حکام کے مطابق اب تک ایک لاش برآمد کرلی گئی ہے جبکہ بچاؤ کارروائیاں تیزی سے جاری ہیں۔
حادثہ کرشنا مائنز کے بلی مارکنڈی علاقے میں اس وقت پیش آیا جب کان کی ایک دیوار اچانک گر گئی۔ ڈسٹرکٹ مجسٹریٹ بی این سنگھ نے تصدیق کی کہ واقعے کے وقت متعدد مزدور اندر کام کر رہے تھے۔ انہوں نے کہا کہ "ابھی تک واضح نہیں کہ کتنے مزدور پھنسے ہوئے ہیں، مگر کئی افراد ملبے تلے دبے ہیں۔”
اتر پردیش کے سماجی بہبود کے وزیر سنجیو کمار گونڈ بھی موقع پر پہنچے۔ ابتدائی اطلاعات کے مطابق تقریباً ایک درجن مزدور پھنسے ہونے کا خدشہ ہے، تاہم حتمی تعداد ملبہ ہٹانے کے بعد سامنے آئے گی۔
موقع پر این ڈی آر ایف اور ایس ڈی آر ایف کی ٹیمیں موجود ہیں جو بھاری مشینری کی مدد سے ملبہ ہٹانے اور پھنسے ہوئے افراد تک پہنچنے کی کوشش کر رہی ہیں۔ حکام کے مطابق ٹیمیں بغیر توقف کام کر رہی ہیں تاکہ زیادہ سے زیادہ جانیں بچائی جاسکیں۔
وزیر نے کہا کہ حادثے کی پوری جانچ کی جائے گی اور ذمہ داروں کے خلاف سخت کارروائی ہوگی۔ حکومت متاثرہ خاندانوں کو معاوضہ فراہم کرے گی اور ہر ممکن مدد دے گی۔
بچاؤ کارروائیاں اب بھی جاری ہیں اور حکام مزید زندگیاں بچانے کی امید ظاہر کر رہے ہیں۔
