یورپی کمیشن کی صدر اُرسولا فان ڈیر لیئن نے کہا ہے کہ کامیاب بھارت دنیا کو زیادہ مستحکم، خوشحال اور محفوظ بناتا ہے۔ وہ نئی دہلی میں منعقد ہونے والی 77ویں یومِ جمہوریہ کی تقریبات میں بطور مہمانِ خصوصی شریک ہوئیں۔ ان کے ہمراہ یورپی کونسل کے صدر انتونیو کوسٹا بھی موجود تھے۔
کرتویہ پتھ پر ہونے والی شاندار پریڈ میں صدرِ جمہوریہ دروپدی مرمو نے سلامی لی۔ اس موقع پر یورپی قیادت کی شرکت کو بھارت اور یورپی اتحاد کے درمیان بڑھتے ہوئے تعلقات کی مضبوط علامت قرار دیا جا رہا ہے۔
اُرسولا فان ڈیر لیئن نے سوشل میڈیا پر اپنے پیغام میں کہا کہ یومِ جمہوریہ کی تقریبات میں شرکت ان کے لیے اعزاز ہے اور ایک مضبوط بھارت سے پوری دنیا فائدہ اٹھاتی ہے۔ یہ بیان ایسے وقت سامنے آیا ہے جب بھارت۔یورپی اتحاد آزاد تجارتی معاہدے پر فیصلہ کن مرحلے میں داخل ہو چکے ہیں۔
ذرائع کے مطابق بھارت اور یورپی اتحاد سربراہی اجلاس میں طویل عرصے سے زیرِ التوا تجارتی معاہدے کے اختتام کا اعلان متوقع ہے۔ اس معاہدے سے تجارت، سرمایہ کاری، دفاع، بحری سلامتی اور سائبر سیکیورٹی جیسے شعبوں میں تعاون بڑھے گا۔
یورپی قیادت نے اس بات پر زور دیا کہ بھارت۔یورپی شراکت داری عالمی غیر یقینی حالات میں مزید اہم ہو گئی ہے۔ دوسری جانب وزیراعظم نریندر مودی نے یورپی رہنماؤں کی موجودگی کو باہمی تعلقات کے لیے نیا حوصلہ قرار دیا۔
