تلنگانہ کے وزیر اعلیٰ ریونت ریڈی کی صدارت میں کابینہ کا اہم اجلاس 15 نومبر کو سچوالیٹ میں منعقد ہوگا۔ سرکاری ذرائع کے مطابق، اس اجلاس میں کئی اہم پالیسی فیصلے کیے جانے کا امکان ہے۔
ذرائع کا کہنا ہے کہ کابینہ اجلاس کی تاریخ جوبلی ہلز ضمنی انتخاب کے نتائج کے بعد رکھی گئی ہے تاکہ عوامی ردعمل کو دیکھ کر سیاسی و انتظامی اقدامات کا فیصلہ کیا جا سکے۔
جوبلی ہلز ضمنی انتخاب کے ووٹوں کی گنتی 14 نومبر کو ہوگی اور نتیجہ دوپہر تک متوقع ہے۔ کانگریس پارٹی کو اپنی جیت پر مکمل اعتماد ہے۔ پارٹی ذرائع کے مطابق، ان کے پاس کارکنوں، وزراء اور مقامی رہنماؤں سے موصول رپورٹس میں واضح اکثریت کی پیش گوئی کی گئی ہے۔
سیاسی مبصرین کا کہنا ہے کہ کانگریس کو یقین ہے کہ بی آر ایس پارٹی کا اثر کمزور ہو رہا ہے، اور نتائج حکومت کی کارکردگی پر عوامی منظوری ظاہر کریں گے۔
یہ اجلاس پہلے 7 نومبر کو ہونا تھا، بعد میں 12 نومبر کے لیے مؤخر کیا گیا، اور اب باضابطہ طور پر 15 نومبر کو طے پایا ہے۔
