وزرا کو میڈیا کی لڑائی سے دور رکھنے کی اپیل، وزیر اعلیٰ کا واضح پیغام
تلنگانہ کے وزیر اعلیٰ ریونت ریڈی نے میڈیا اداروں سے اپیل کی ہے کہ وہ آپسی رقابت میں وزرا کو نہ گھسیٹیں اور ریاستی حکومت کی شبیہ کو نقصان نہ پہنچائیں۔ اتوار کے روز کھمم میں ایک عوامی اجتماع سے خطاب کرتے ہوئے انہوں نے کہا کہ میڈیا کو چاہیے کہ اپنے اختلافات آپس میں حل کرے، نہ کہ وزرا کے خلاف بدنام کن خبریں نشر کرے۔
وزیر اعلیٰ نے کہا کہ سنگارینی کولیئریز کمپنی سے متعلق شائع ہونے والی بعض خبروں میں بدعنوانی کے الزامات لگائے گئے، جو سراسر بے بنیاد ہیں۔ ان کے مطابق ان خبروں میں نائب وزیر اعلیٰ بھٹی وکرمارکا کو نشانہ بنایا گیا، جو نہ صرف ناانصافی ہے بلکہ عوام میں شکوک و شبہات پیدا کرنے کے مترادف ہے۔
ریونت ریڈی نے دوٹوک انداز میں کہا کہ ان کی حکومت میں بدعنوانی کی کوئی گنجائش نہیں۔ انہوں نے میڈیا کو مشورہ دیا کہ کسی بھی وزیر، رکن پارلیمان یا رکن اسمبلی کے بارے میں خبر شائع کرنے سے پہلے وزیر اعلیٰ سے وضاحت حاصل کریں۔ ان کا کہنا تھا کہ وہ بحیثیت وزیر اعلیٰ ہر وقت وضاحت کے لیے دستیاب ہیں۔
سیاسی حوالے سے گفتگو کرتے ہوئے ریونت ریڈی نے کہا کہ حکومت میں ہم آہنگی کے ساتھ کام ہو رہا ہے اور انہیں یقین ہے کہ کانگریس آئندہ دس برس تک اقتدار میں رہے گی۔ انہوں نے تلنگانہ کو ملک کی نمبر ون ریاست بنانے کے عزم کا اعادہ کیا۔
