تلنگانہ خدمات کے شعبے میں آگے، نیتی آیوگ نے بی آر ایس پالیسیوں کو سراہا

تلنگانہ نے خدمات کے شعبے میں غیر معمولی ترقی حاصل کی ہے۔ نیتی آیوگ کی تازہ رپورٹ کے مطابق، ریاست نے پچھلے دس سالوں میں نمایاں کارکردگی دکھائی، جس کا سہرا سابقہ بی آر ایس حکومت اور چیف منسٹر کے چندر شیکھر راؤ کی پالیسیوں کو دیا گیا ہے۔

رپورٹ کے مطابق، 2023-24 میں تلنگانہ کی 34.8 فیصد افرادی قوت یعنی 62 لاکھ سے زائد افراد خدمات کے شعبے میں کام کر رہے ہیں، جو قومی اوسط 29.7 فیصد سے کہیں زیادہ ہے۔ ریاست کو اُن سرفہرست ریاستوں میں شامل کیا گیا ہے جن کی خدماتی معیشت 55 فیصد سے زائد ہے۔ ان میں دہلی، کرناٹک، کیرالہ، بہار اور مہاراشٹر بھی شامل ہیں۔

رپورٹ میں بتایا گیا ہے کہ شہری علاقوں میں 66.6 فیصد مزدور خدمات میں مصروف ہیں جبکہ دیہی علاقوں میں صرف 18.9 فیصد۔ مردوں کی شرکت 41.5 فیصد اور خواتین کی 23.9 فیصد رہی۔

سب سے زیادہ ملازمتیں تجارت (28.2%)، ٹرانسپورٹ (16.1%)، اور آئی ٹی و کمیونیکیشن (12%) میں ہیں۔
نیتی آیوگ نے تجویز دی ہے کہ وارنگل اور کریمنگر جیسے ٹائر–2 شہروں کو ترقی دے کر اس فرق کو کم کیا جا سکتا ہے۔

ماہرین کے مطابق، یہ کامیابی کے ٹی راما راؤ کی قیادت میں ڈیجیٹل ترقی، اسٹارٹ اپس، اور عالمی سرمایہ کاری کی پالیسیوں کا نتیجہ ہے جن سے لاکھوں روزگار کے مواقع پیدا ہوئے۔