امریکہ اور جاپان کا اہم معاہدہ نایاب معدنیات کے تحفظ اور سپلائی پر اتفاق

امریکی صدر ڈونلڈ ٹرمپ نے جاپان کے وزیرِاعظم سانائے تاکائچی کے ساتھ ملاقات میں نایاب معدنیات اور اہم قدرتی وسائل کی سپلائی کو محفوظ بنانے کے لیے ایک اہم معاہدے پر دستخط کیے۔ یہ معاہدہ ٹوکیو میں ٹرمپ کے ایشیا کے دورے کے دوران طے پایا۔

وہائٹ ہاؤس کے مطابق، اس معاہدے کا مقصد دونوں ممالک کے درمیان اہم معدنیات اور ریئر ارتھ سپلائی چین کو مضبوط بنانا اور چین کی جانب سے ان پر بڑھتی پابندیوں کا مؤثر جواب دینا ہے۔ دونوں ممالک مقناطیس، بیٹری، اور صنعتی دھاتوں جیسے منصوبوں میں مشترکہ تعاون کریں گے۔

صدر ٹرمپ نے کہا کہ “امریکہ اور جاپان سب سے مضبوط اتحادی ہیں” اور واشنگٹن ہمیشہ ٹوکیو کے ساتھ کھڑا رہے گا۔
تاکائچی نے بھی عزم ظاہر کیا کہ وہ دونوں ممالک کے درمیان تعلقات کو “نئے سنہری دور” میں داخل کرنا چاہتی ہیں، تاکہ جاپان اور امریکہ مزید مضبوط اور خوشحال بن سکیں۔

اس سے قبل ٹرمپ نے ملائیشیا کے وزیراعظم انور ابراہیم کے ساتھ بھی ایک تجارتی معاہدہ کیا تھا، جس سے امریکہ کو مزید قدرتی وسائل تک رسائی حاصل ہوگی۔

ٹوکیو میں دونوں رہنماؤں نے دفاعی تعاون اور خطے کے امن پر بھی تبادلۂ خیال کیا۔ جاپان نے اعلان کیا کہ وہ اپنی دفاعی اخراجات کو دو سال پہلے ہی دو فیصد جی ڈی پی تک بڑھائے گا۔
ماہرین کے مطابق، یہ معاہدہ نہ صرف معاشی استحکام کے لیے اہم ہے بلکہ ایشیا میں سلامتی اور تزویراتی تعلقات کو بھی مضبوط کرے گا۔