ٹرمپ نے سعودی عرب کو غیر نیٹو اہم اتحادی قرار دے دیا
امریکی صدر ڈونالڈ ٹرمپ نے ایک تاریخی اعلان کرتے ہوئے سعودی عرب کو غیر نیٹو اہم اتحادی کا درجہ دے دیا۔ یہ فیصلہ اُس وقت سامنے آیا جب ٹرمپ نے سعودی ولی عہد شہزادہ محمد بن سلمان کی سات برس بعد پہلی وائٹ ہاؤس آمد پر شاندار انداز میں میزبانی کی۔
ٹرمپ نے عشائیہ کے دوران اعلان کیا کہ دونوں ممالک کے درمیان فوجی تعاون کو ایک نئی بلندی پر لے جایا جا رہا ہے۔ اس خصوصی درجہ بندی سے پہلے دنیا میں صرف انیس ممالک کو یہ مقام حاصل تھا، جو سعودی عرب کی اہمیت اور اسٹریٹیجک کردار کی علامت ہے۔
ٹرمپ نے جمال خاشقجی قتل کیس سے متعلق امریکی انٹیلیجنس کے الزامات بھی مسترد کرتے ہوئے کہا کہ ولی عہد اس معاملے سے "باخبر نہیں تھے” اور اب دونوں ملکوں کے تعلقات "نئی مضبوط بنیاد” پر کھڑے ہیں۔ انہوں نے کہا کہ شہزادہ محمد بن سلمان مستقبل میں مشرقِ وسطیٰ کی سیاست میں “اہم کردار” ادا کریں گے۔
دوسری جانب ولی عہد نے اعلان کیا کہ سعودی عرب نے امریکہ میں اپنی سرمایہ کاری 600 ارب سے بڑھا کر 1 کھرب ڈالر کرنے کا فیصلہ کیا ہے۔ انہوں نے امریکہ کو دنیا کی “سب سے پرکشش سرمایہ کاری کی منزل” قرار دیا۔
ٹرمپ کے خاندان کی سعودی سرمایہ کاری سے متعلق اعتراضات پر ٹرمپ نے جواب دیا: “میرا خاندانی کاروبار سے کوئی تعلق نہیں۔”
ملاقات کے دوران امریکہ نے سعودی عرب کو ایف-35 لڑاکا طیارے اور 300 جدید ٹینکوں کی فروخت کی منظوری بھی دی، جبکہ سرمایہ کاری، معدنیات، منی لانڈرنگ کے خلاف کارروائی اور دہشت گردی کے مالی تعاون کی روک تھام پر متعدد معاہدے بھی طے پائے۔
